• अर्थ सरोकार सम्बाददाता 

काठमाडौँ । आँधिखोला लघुवित्त वित्तीय संस्थाले आर्थिक वर्ष २०७६/७७ को तेस्रो त्रैमास वित्तीय विवरण सार्वजनिक गरेको छ । सार्वजनिक गरेको विवरण अनुसार संस्थाले १ करोड १७ लाख रुपैयाँ खुद नाफा कमाएको छ । गत वर्षको सोहि अवधिमा संस्थाले १ करोड ११ लाख रुपैयाँ खुद नाफा कमाए थियो । 

यस्तै, संस्थाको खुद ब्याज आम्दानी ५९%ले बढेर ४ करोड ३० लाख रुपैयाँ पुगेको छ । गत वर्षको सोहि अवधिमा संस्थाले २ करोड ७० लाख रुपैयाँ खुद ब्याज आम्दानी गरेको थियो । खुद ब्याज आम्दानीमा उल्लेख्य सुधार भएपनि लघुवित्तको खुद नाफा भने सामान्य मात्र बढेको छ ।

यो तेश्रो त्रैमाससम्ममा संस्थाको निष्क्रिय कर्जा १.८५ प्रतिशतबाट बढेर ४.४४% पुगेको छ। गत वर्ष संस्थाको निष्क्रिय कर्जा २.५९% रहेको थियो । संस्थाको खर्च र निष्क्रिय कर्जा बढेपछि खुद नाफा प्रभावित भएको देखिन्छ ।

१० करोड चुक्ता पूँजी रहेको यस लघुवित्तले चालु आवको चैत मसान्तसम्ममा ३ करोड १८ लाख रुपैयाँ जगेडा कोषमा सञ्चय गरेको छ। गत आवको सोही अवधिसम्ममा लघुवित्तको जगेडा कोषमा ३८ लाख रुपैयाँ सञ्चित थियो । संस्थाले सम्भावित जोखिम बापतको व्यवस्थामा करोड ६ लाख रुपैयाँ छुट्याएको छ । गत वर्ष सम्भावित जोखिम बापतको व्यवस्थामा संस्थाले साढे ७२ लाख रुपैयाँ छुट्याएको थियो। 

लघुवित्तले २७ लाख ९० हजार रुपैयाँ निक्षेप र ३४ करोड २८ लाख रुपैयाँ सापटीबाट ७० करोड ९३ लाख रुपैयाँ कर्जा प्रवाह गरेको छ । गत आवको सोही अवधिमा लघुवित्तले १९ करोड ४० लाख रुपैयाँ निक्षेप र ३७ करोड ९५ लाख रुपैयाँ सापटीबाट ६० करोड ९४ लाख रुपैयाँ कर्जा परिचालन गरेको थियो।