- अर्थ सरोकार सम्बाददाता
काठमाडौं – वाणिज्य बैंकहरुको छाता संगठन बैंकर्स संघले नेपाल राष्ट्र बैंकलाई पत्राचार गरेको छ । बैंकहरुले कर्पोरेट सामाजिक उत्तरदायित्व (सीएसआर) मा खर्च गर्नु पर्ने रकममध्ये आधा रकम संघमार्फत खर्च गर्न पाउने व्यवस्था मिलाइदिन आग्रह गर्दै राष्ट्र बैंकलाई पत्राचार गरेको हो ।
संघका अध्यक्ष भुवन दाहालका अनुसार बैंक आफैंले खर्च गर्दा स-साना काममा खर्च भएको हुनाले त्यसको आधा रकम संघमार्फत खर्च गर्न पाउनु पर्ने जनाएका छन् ।
संघमा जम्मा भएको सीएसआरको ५० प्रतिशत रकम आवश्यकता अनुसार स्वास्थ्य, सामाजिक, शिक्षा लगायतका क्षेत्रमा सहयोग गर्ने उदेश्य हुनाले अध्यक्ष दाहालले यसका लागि राष्ट्र बैंकलाई पत्राचार गरेका हुन् । सबै बैंकहरुले कोषमा रकम जम्मा गर्दा ठुलो परिमाणमा रकम जम्मा हुने भएकाले सो रकमले बैंकिङ क्षेत्रको योगदान समाज कल्याणमा धेरै हुने उनको भनाइ छ ।
राष्ट्र बैंकले आर्थिक वर्ष २०७३र७४ को मौद्रिक नीतिमार्फत बैंक तथा वित्तीय संस्थाले कुल नाफाको १ प्रतिशत रकम सीएसआरमा अनिवार्य खर्च गर्नु पर्ने व्यवस्था गरेको थियो । जसअनुसार हालसम्म बैंकिङ क्षेत्रबाट अर्बौ रुपैयाँ सीएसआर अन्तर्गत खर्च भइरहेको छ । बैंकहरुले नाफाको १ प्रतिशत रकम आफुखुसी खर्च गर्ने र सोको जानकारी राष्ट्र बैंकका गराइरहेका छन् ।
