• अर्थ सरोकार सम्बाददाता 

काठमाडौँ । नेपाल इन्भेष्टमेन्ट बैंक लिमिटेडले चालु आर्थिक बर्षको तेश्रो त्रैमासको वित्तीय विवरण सार्वजनिक गरेको छ । सार्वजनिक भएको विवरण अनुसार आर्थिक वर्षको तेस्रो त्रैमाससम्ममा बैंकले २ अर्ब ४९ करोड ५५ लाख रुपैयाँ खुद नाफा कमाएको छ, जुन गत वर्षको तुलनामा २.७३ प्रतिशत कम हो । गत वर्षको यसै अवधिमा बैंकले २ अर्ब ५६ करोड ५६ लाख रुपैयाँ खुद नाफा कमाएको थियो। चैत मसान्तसम्म बैंकले १ खर्ब ५६ अर्ब रुपैयाँ निक्षेप संकलन गर्दा १ खर्ब ३८ अर्ब रुपैयाँ कर्जा प्रवाह गरेको छ। गत आर्थिक वर्षको अन्त्यसम्ममा बैंकले १ खर्ब ४९ अर्ब रुपैयाँ निक्षेप संकलन गरी १ खर्ब २२ अर्ब रुपैयाँ कर्जा लगानी गरेको थियो।

यस अवधिमा बैंकले २४ करोड ७१ लाख रुपैयाँ वितरणयोग्य नाफा कमाएको छ। यो गत आर्थिक वर्षको तुलनामा ८२.८० प्रतिशतले घटेको हो । गत आर्थिक वर्षको तुलनामा बैंकको खुद ब्याज आम्दानी ७.६५ प्रतिशत घटेर ४ अर्ब ५३ करोड रुपैयाँमा खुम्चिएको छ । गत आर्थिक वर्षको यसै अवधिमा बैंकले ४ अर्ब ९१ करोड रुपैयाँ खुद ब्याज आम्दानी गरेको थियो। यता सञ्चालन नाफा पनि ३.३० प्रतिशतले घटेरे ३ अर्ब ५६ करोड रुपैयाँमा खुम्चिएको छ । गत आर्थिक वर्षको यसै अवधिमा बैंकले ३ अर्ब ६८ करोड रुपैयाँ सञ्चालन नाफा गरेको थियो ।

साधारण सभामै कुटाकुट चल्ने ‘असाधारण’ बैंकको रुपमा चर्चा बटुल्दै गएको बैंकको खर्च पनि बढ्दै गएको छ। यस अवधिमा बैंकको कर्मचारी खर्च १ अर्ब १२ करोड रुपैयाँबाट बढेर १ अर्ब १५ करोड रुपैयाँ पुगेको छ। त्यस्तै, अन्य सञ्चालन खर्च पनि ५४ करोड रुपैयाँबाट बढेर ६१ करोड रुपैयाँ पुगेका छ। विवरणअनुसार बैंकको प्रतिशेयर आम्दानी ३ रुपैयाँ ७९ पैसा घटेर २३ रुपैयाँ ३८ पैसा कायम भएको छ। बैंकको प्रतिशेयर नेटवर्थ भने १९० रुपैयाँ रहेको छ भने मूल्य आम्दानी अनुपात १५.९५ गुणा रहेको छ । १४ अर्ब २४ करोड रुपैयाँ चुक्ता पुँजी रहेको बैंकको जगेडा कोषमा ११ अर्ब ५७ करोड रुपैयाँ छ।