- अर्थ सरोकार सम्बाददाता
काठमाडौँ । प्रोग्रेशिभ फाईनान्सले आर्थिक वर्ष २०७६/७७ को तेस्रो त्रैमासको वित्तीय विवरण सार्वजनिक गरेको छ । सार्वजनिक गरेको विवरण अनुसार फाईनान्सले २० लाख रुपैयाँ नोक्सनी व्यहोर्नु परेको छ । गत आर्थिक वर्षको सोही अवधिसम्ममा फाईनान्सले दुई करोड ९१ लाख रुपैयाँ खुद नाफा कमाएको थियो । फाइनान्सको इम्पेरिमेन्ट चार्ज बढ्दा तथा खर्च व्यवस्थापन गर्न नसक्दा नोक्सानी व्यहोर्नु परेको हो ।
चैत मसान्तसम्ममा फाइनान्सको ईम्पेरिमेन्ट चार्ज तीन करोड ५५ लाख रुपैयाँ रहेको छ भने कर्मचारी खर्च २ करोड ३५ लाख रुपैयाँ र अन्य सञ्चालन खर्च दुई करोड १६ लाख रुपैयाँ गरेको देखिन्छ।
फाईनान्सले ७ करोड ५९ लाख रुपैयाँ खुद ब्याज आम्दानी गरेको छ। गत आवको सोही अवधिमा फाईनान्सले ४ करोड १२ लाख रुपैयाँ खुद ब्याज आम्दानी गरेको थियो । साथै यस अवधिसम्ममा फाइनान्सको सञ्चालन मुनाफा दुई करोड ८ लाख रुपैयाँ ऋणात्मक रहेको छ। यो गत आवको सोही अवधिसम्ममा फाईनान्सको सञ्चालन मुनाफा ३ करोड ४६ लाख रुपैयाँ धनात्मक रहेको थियो।
यो तेश्रो त्रैमाससम्ममा संस्थाले १ अर्ब ४८ करोड रुपैयाँ निक्षेप संकलन गरी एक अर्ब १७ करोड रुपैयाँ कर्जा लगानी गरेको छ । हाल संस्थाको चुक्ता पूँजी ८० करोड रुपैयाँ रहेको छ । गत चैत मसान्तसम्ममा ३.३९ प्रतिशत रहेको फाईनान्सको निष्कृय कर्जा अनुपात घटेर २.९८ प्रतिशतमा झरेको छ।
