- अर्थ सरोकार सम्बाददाता
काठमाडौं । आइसीएफसी फाइनान्सले आर्थिक वर्ष २०७७/७८ को पहिलो त्रैमासको वित्तीय विवरण सार्वजनिक गरेको छ । सार्वजनिक गरेको विवरण अनुसार कम्पनीको अधिकांश सूचक मजबुद भएको छ । बैंकको खुद नाफा २०६.५० प्रतिशतले बढोत्तरी गरी ९ करोड ३७ लाख २० हजार रुपैयाँ कमाएको रिपोर्ट सार्वजनिक गरेको छ । गत वर्ष कम्पनीले ३ करोड ५ लाख ७७ हजार रुपैयाँ खुद नाफा कमाएको थियो ।
यस्तै, संस्थाको खुद ब्याज आम्दानी भने ५.४९% ले घटेर १० करोड २० लाख ३१ हजार रुपैयाँमा सिमित भएको छ ।तर, संस्थाको सञ्चालन नाफामा उल्लेख्य सुधार भएपछि खुद नाफा पनि बढेको देखिन्छ । संस्थाले पहिलो त्रैमास सञ्चालन नाफा १३ करोड ३८ लाख ८६ हजार रुपैयाँ गर्न सफल भएको छ ।
यो असोज मसान्तसम्ममा संस्थाले १३ अर्ब ४ करोड २१ लाख रुपैयाँ निक्षेप संकलन गरेर ८ अर्ब ४७ करोड ५० लाख रुपैयाँ कर्जा लगानी गरेको छ । प्रकाशित विवरणमा संस्थाको खराब कर्जा भने बढेको छ । संस्थाको खराब कर्जा ०.२८% बाट बढेर ०.५३% पुगेको छ । संस्थाको कस्ट अफ फन्ड ७.९१% र बेस रेट ८.५८% रहेको छ ।
हाल यस कम्पनीको चुक्ता पुँजी ९२ करोड ६५ लाख रुपैयाँ रहेको छ भने रिजर्भ कोषमा ३१ करोड १२ लाख ८६ हजार रुपैयाँ छ । संस्थाको प्रतिसेयर आम्दानी ४४ रुपैयाँ २२ पैसा रहेको छ भने प्रतिसेयर नेटवर्थ १५२ रुपैयाँ ६९ पैसा रहेको विवरणमा उल्लेख छ ।
