- अर्थ सरोकार सम्बाददाता
रुकुम । लकडाउनका कारण धेरै नागरिक बेरोजगार बन्नुपरेको छ । त्यसमा पनि लकडाउनका कारण श्रमिक बर्गलाई ठुलो समस्या परेको छ । यस्तै लकडाउनकै कारण देशका कतिपय स्थानमा चोरीका घटना बढेका छन् । यस्तै घटना घटेको छ, रुकुम पश्चिमको जिल्ला सदरमुकामको मुख्य बजारमा रहेको नेपाल बैंक लिमिटेडमा । जिल्लाको नेपाल बैंकको शाखामा पैसा चोर्ने नियतका साथ शाखाको एटिएम मेसिनमा तोडफोड भएको छ । मेसिन तोडफोडमा संलग्न एक जनालाई प्रहरी पक्राउ गरेको छ ।
बैकको एटिएम मेसिन फोर्दै गरेको अवस्थामा मुसिकोट नगपालिका वडा नम्बर १ का ३० बर्षिय भिमबहादुर बि.क.लाई पक्राउ गरिएको प्रहरीले जनाएको छ । जिल्ला प्रहरी कार्यालय रुकुम पश्चिमका प्रहरी निरीक्षक डेकेन्द्र शर्माका अनुसार एटिएम मेसिनमा सप्पल प्रहार गरेर चोरी गर्न लाग्दा बैक मेनेजरले सिसिक्यामराबाट थाहा पाएपछि प्रहरीलाई खबर गर्नु भएको थियो । तत्कालै नजिकैको प्रहरीले भिमबहादुरलाई नियन्त्रणमा लिएकोे थियो । उनले बयानका क्रममा लकडाउनका कारण काम पनि नभएको र पैसा पनि नभएको भन्दै उनले ए टि एम फोड्ने प्रयास गरेको बताएका छन् ।
सप्पल हानेर एटिएम फोर्ने प्रयास गरेका बिकको प्रयासपछी एटिएम मेसिन बिग्रेको छ । थप अनुसन्धान भईरहेको बताएका छन् ।
