- अर्थ सरोकार सम्बाददाता
काठमाडौं । नेशनल माइक्रोफाइनान्स र महिला सहयात्रा लघुवित्तले जेठ २५ गते मंगलबार विशेष साधारणसभा बोलाएका छन् । गाभ्ने, गाभिने प्रस्ताव पारित गर्न सभामा बोलाएका हुन् । नेशनल माइक्रोफाइनान्सले महिलालाई एक्वायर गर्दैछ । नेशनलको सभा केन्द्रीय कार्यालय धादिङबेसी, धादिङमा बिहान ११ बजे सुरु हुनेछ भने महिला सहयात्राको सभा केन्द्रीय कार्यालय मकवानपुर बिहान ११ बजे नै सुरु हुनेछ ।
सभामा नेशनलले १००ः६८ अनुपातमा महिला सहयात्रालाई गाभ्ने प्रस्ताव पेश हुनेछ । अर्थात, महिला सहयात्राको १०० कित्ता सेयर हुने सेयरधनीले मर्जपछि बन्ने नेसनलको ६८ कित्ता सेयर पाउनेछन् । दुवैले सभाको विशेष प्रस्तावका रुपमा डीडीएका आधारमा स्वाप रेसियो पारित गर्ने एजेन्डा पनि राखेका छन् । सभामा कम्पनीको प्रबन्धपत्र तथा नियमावली संशोधन गर्न सञ्चालक समितिलाई अख्तियारी प्रदान गर्ने प्रस्ताव पनि छ ।
विषेश सभा प्रयोजनका लागि दुवै कम्पनीले जेठ १७ गते बुक क्लोज गरेका छन् । यता, नेपाल राष्ट्र बैंकले नेसनल माइक्रोफाइनान्सलाई महिला सहयात्रा लघुवित्तलाई आफूमा गाभ्न स्वीकृति प्रदान गरिसकेको छ । राष्ट्र बैंकले वैशाख १५ गते यी दुई संस्थालाई मर्जर तथा प्राप्तिको लागि सैद्धान्तिक स्वीकृति प्रदान गरेको हो । यसअघि गत माघ ८ गते दुई संस्थाबीच बिहीबार मर्जर तथा प्राप्ति सम्बन्धि सम्झौतामा हस्ताक्षर भएको हो ।
