• अर्थ सरोकार सम्बाददाता

काठमाडौँ । देशभर विभिन्न घटना घट्छन् । केहि सामान्य समाचारका विषय हुन्छन्, केहि समाचारले असामान्य कम्पन पैदा गरिदिन्छन् । केहि तस्विर फगत तस्विरमात्र हुन्छन् भने केहि तस्विरले देश बोल्दछन् । हामी हरेक दिन सातै प्रदेशका त्यस्ता तस्विरहरुलाई प्रकाशन गर्छौँ, जसले देश र जनताको आर्थिक स्थिति प्रतिनिधित्व गर्छ । समसामयिक विषयमा राज्यलाई खबरदारी गर्छ र जनताको जीवन बोल्छ । आज कुन कुन ठाउँमा के के भयो ? यी दृश्यहरु आफैं बोलिरहेछन् ।

आजको अंकमा हामीले लमजुङ बेँसीशहर नगरपालिका–७ स्थित राष्ट्रिय बाणिज्य बैंकमा बिहीबार सेवा लिन आएका सेवाग्राहीदेखि कोभिड–१९ विरुद्धको खोप लगाउन पोखरा महानगरपालिका– ८ स्थित  वडा कार्यलय जम्मा भएका ज्येष्ठ नागरिकसम्मका दृश्यलाई फोटोमा समेटेका छौं ।

लमजुङ बेँसीशहर नगरपालिका–७ स्थित राष्ट्रिय बाणिज्य बैंकमा त्यस आसपास क्षेत्रबाट बिहीबार सेवा लिन आएका सेवाग्राही । ठूलो भीडभाडले सेवाग्राहीका साथ वरिपरीका स्थानीयलाई समेत सङ्क्रमणको जोखिम बढेको छ । 

कोभिड–१९ विरुद्धको खोप लगाउन पोखरा महानगरपालिका– ८ स्थित  वडा कार्यलय जम्मा भएका ज्येष्ठ नागरिक । अहिले पोखरामा उमेर ६२–६४ वर्षका ज्येष्ठ नागरिकलाई मात्र खोप लगाउने कार्यक्रम छ ।

कोभिड–१९ को सङ्क्रमणका कारण सरकारले जारी गरेको निषेधाज्ञामा बिहान मात्रै पसल खुला हुने हुँदा लगनखेलमा फलफूल किन्दै सर्वसाधारण । 

म्याग्दीको रघुगङ्गा गाउँपालिका– ८ पात्लेखर्कका केही युवा भिर मौरीको मह सङ्कलन गर्दै । यस प्रकारको मह जडिबुटीजन्य औषधिको रुपमा प्रयोग गरिने भएकाले यसको माग बढेको छ ।  

बेसिसहरदेखि चामेका लागि बोकेका युवती । गत जेठ १४ गते आएको वर्षादका कारण बेसिसहर चामे सडक खण्डको स्याल्क्यु खोलाको पुल बगेपछि मानिस काठको फलेकको भरमा ओसार प्रसार गर्न बाध्य छन् । 

सप्तरीको राजविराजमा कोरोना महामारीको जोखिम बढेपछि घरमै  बिहीवार पूजा गरिँदै । पतिको दीर्घ जीवन तथा सुमधुर दाम्पत्य जीवनको कामना गर्दै वट सावित्री (वरसाईत) पर्व मनाइने चलन छ । 

नयाँ बानेश्वरमा निर्माण गरिएको फालामको आकाशे पुल । पुल ठडिए पनि सर्वसाधारण भने आवतजावत गर्नका लागि अझै केही समय लाग्नेछ ।

नयाँ सडकस्थित मर्मत हुँदै गरेको न्यूरोड गेट ।