काठमाडौँ । भुक्तानी सेवा प्रदायक कम्पनी ईसेवाले एसईई परीक्षा उत्तिर्ण गरेका विद्यार्थीलाई बम्पर अफर सार्वजनिक गरेको छ । यस अफरअन्तर्गत एक हजार जना विद्यार्थीले नेपालका विभिन्न कलेजमा शत प्रतिशत ‘स्कोलरसिप’ मा अध्ययन गर्न पाउने कम्पनीले जनाएको छ ।
यसका लागि विद्यार्थीहरुले ईसेवाको एकाउन्ट खोलेको हुनुपर्नेछ । त्यसपछि ईसेवा एपमार्फत आफूले अध्ययन गर्न चाहेको कलेज र पढ्न चाहेको विषय रोज्नु पर्नेछ । विद्यार्थीले १० रुपैयाँ तिरेर आवेदन दिन सक्नेछन् र त्यसमा १० प्रतिशत क्यासब्याक पाउनेछन् ।
यस योजनामा सहभागी हुन विद्यार्थीले आफ्नो वास्तविक मार्कसिट र चारित्रिक प्रमाणपत्र समावेश गर्नुपर्नेछ । कुन कलेजमा पढ्ने भन्ने कुरा ब्लग डट इसेवा डटकम डट एनपीमा हेर्न सकिनेछ । हाल एण्ड्रोइड मोबाइलमा ५२ लाख र आईओएसमा करिब १० लाख गरी ६० लाख बढीले सेवा लिइरहेको कम्पनीको दावी छ ।
ईसेवाबाट इन्स्योरेन्सको प्रिमियम, इन्टरनेट, बिजुली तथा खानेपानीको महशुल, मोबाइल, टेलिफोन रिचार्ज तथा टपअप, हवाई जहाज, बसको टिकट, स्कुल कलेज लगायतका सेवाहरूको शुल्क भुक्तानी गर्न सकिन्छ ।
ईसेवामा हाल ५२ वटा बैंक तथा वित्तीय संस्था सदस्य छन् । यी बैंकबाट ईसेवामा सहजै रकम जम्मा गर्न तथा ईसेवाबाट बैंक खातामा पठाउन सकिन्छ ।
