काठमाडौं । धितोपत्र बोर्डले नेप्से र आफ्नै कमिसन घटाउने र त्यसपछि ब्रोकरहरुको कमिसन घटाउने तयारी थालेको छ । धितोपत्र बोर्डले सेयर मार्केटमा नियमनकारी भुमिका खेलेवापत र कारोबारस्थल उपलब्ध गराएवापत नेपाल स्टक एक्सचेन्ज (नेप्से)ले लिँदै आएको कमिसन घटाउने भएको हो । लगानीकर्ताको हितका लागि नियमनकारी निकायबाटै लिईने शुल्क घटाउने तयारी थालेको नेपाल धितोपत्र बोर्डका अध्यक्ष रमेश हमालले बताएका छन् ।
धितोपत्र बोर्ड, नेप्से, सिडिएससी तथा ब्रोकरलाई तिर्ने ठुलो रकमले लगानीकर्ता मर्कामा परेको भन्दै यस्तो शुल्क घटाउन गृहकार्य थालेको बोर्डका अध्यक्ष रमेश हमालले बताएका छन् । ‘पहिलो चरणमा धितोपत्र बोर्ड र नेप्सेले लिने शुल्क घटाउने गृहकार्य थालेका छौँ’,उनले भने, ‘त्यसपछि ब्रोकर कमिसन घटाउन पहल गर्छौं ।’
अहिले बोर्डले ब्रोकरबाट ०.६ प्रतिशत र लगानीकर्ताबाट ०.०१५ कमिसन लिँदै आएको छ । नेप्सेले ब्रोकरले उठाउनेबाट २० प्रतिशत कमिसन लिन्छ भने नेप्सेले लिएको कुल कमिसनबाट सिडिएससीले १७ प्रतिशत कमिसन लिन्छ । यसरी दोहोरो शुल्कको मारमा लगानीकर्ता परेपछि लगानीकर्ताकै हितका लागि यस्तो निर्णय गरेको बोर्डका अध्यक्ष हमालले बताएका छन् । यस विषयमा थप अध्ययन भइरहेको बोर्डका अध्यक्ष हमालले बताएका छन् ।
