काठमाडौँ । मलेसियामा आयोजित WITSA Global Innovation & Tech Excellence Awards 2022 मा रहेको थुप्रै क्याटागोरीमध्ये खल्ती ‘डिजिटल अपर्चुनिटी/इन्क्लुजन अवार्डद्वारा सम्मानित भएको छ । उक्त अवार्ड WITSA -World Innovation, Technology, And Service Alliance ले प्रदान गरेको थियो ।

अवार्ड कार्यक्रममा विश्वभरका ८० भन्दा बढी देश सहभागिता रहेको थियो। बहुप्रतिष्ठित अन्तर्राष्ट्रिय WITSA अवार्डबाट खल्ती सम्मानित हुँदा यसले नेपाललाई पनि अन्तर्राष्ट्रिय स्थरमा चिनाएको छ । उक्त अवार्डमा उपस्थित खल्तीका प्रमुख कार्यकारी अधिकृत विनय खड्काले खल्तीलाई आजको दिन यो स्थानसम्म पुर्याउन सहयोग गर्ने सम्पूर्ण खल्ती प्रयोगकर्ता, साझेदार, व्यापारी तथा एजेन्ट, नियामक, खल्ती र अन्य सरोकारवालालाई धन्यवाद दिएका थिए।

साथै आउँदा दिनमा अन्तर्राष्ट्रिय बजार वित्तीय सेवाको प्रविधि बुझ्दै आफ्नो सेवालाई अन्तर्राष्ट्रिय बजारमा पनि विस्तार गर्ने उद्देश्य रहेको उनले जानकारी दिए । The World Congress On Innovation & Technology (WCIT) सन् १९७८ देखि स्थापना भएको World Innovation, Technology And Services Alliance (WITSA) को एक महत्वपूर्ण तथा प्रतिष्ठित इभेन्ट हो ।

अवार्डका बारे खल्तीका प्रमुख कार्यकारी अधिकृत विनय खड्काले भने, ‘खल्ती WITSA को अवार्डद्वारा सम्मानित हुनु हाम्रो र हाम्रो देश नेपालका लागि निकै गौरभको कुरा हो । यस अवार्डले हामीलाई लक्ष्यप्रति थप गम्भीर हुन प्रोत्साहन दिँदै थप चुनौती थपिदिएको छ ।’

खल्ती डिजिटल वालेटको ६० हजार बढी एजेन्ट नेटवर्कका साथमा देशभर २३ लाखभन्दा बढी प्रयोगकर्ता रहेका छन् । यसमार्फत प्रयोगकर्ताले बिलहरु भुक्तानी, मोबाइल र टिभी रिचार्ज, उडान र चलचित्र टिकट बुकिङ, बीमा प्रिमियम, अनलाइन सपिङ साइटहरु, सरकारी राजस्व, फोहोर व्यवस्थापन बिलहरु र अन्य धेरै सेवाहरुको डिजिटल भुक्तानी गर्न सकिने कम्पनी जनाएको छ।