">
काठमाडौं । इलेक्ट्रिक कार निर्माता कम्पनी टेस्लाका सिइओ तथा विश्वकै धनाढ्य व्यक्ति एलन मस्कले ४४ अर्ब अमेरिकी डलरमा ट्वीटरको स्वामित्व लिए । स्वामित्व लिएसँगै मस्कले ट्वीटरका तीन उच्च अधिकारीलाई बर्खास्त गरे ।
मस्कले ट्वीटरको केन्द्रीय कार्यालयमा प्रवेश गरेकै दिन सिईओ पराग अग्रवाल, चिफ फाइनान्सियल अफिसर नेड सेगल र लिगल एन्ड पोलिसी एक्जुकेटिभ विजया गाडेलाई बर्खास्त गरेका थिए । तर, तीन अधिकारीमाथिको कार्वाहीको जरिवाना स्वरुप ट्वीटरले कुल १ सय मिलियन डलर (१३ अर्ब २५ करोड ४१ लाख नेपाली रुपैयाँ) तिर्ने ब्लूमबर्गको रिपोर्टले जनाएको छ ।
अन्तराष्ट्रिय संचारमाध्यमका अनुसार सबैभन्दा धेरै जरिवानावापतको रकम पराग अग्रवालले पाउने भएका छन् । उनले कुल जरिवानाको आधा ५० मिलियन डलर (करिब ६ अर्ब ६२ करोड नेपाली रुपैयाँ) पाउनेछन् । त्यस्तै सेगलले ३७ मिलियन डलर र गड्डेले १७ मिलियन डलर रुपैयाँ पाउनेछन् ।
गतवर्ष नोभेम्बरमा ज्याक डोर्सीले राजीनामा दिएपछि ट्विटरले पराग अग्रवाललाई सीईओको रुपमा अघि सारेको थियो । उनी त्यसअघि ट्वीटरमा चिफ टेक्नोलोजी अफिसरका रुपमा कार्यरत थिए । सिईओमा नियुक्त भएसँगै अग्रवालको तलब वार्षिक १ मिलियन डलर (९ करोड २४ लाख भारतीय रुपैयाँ) तोकिएको थियो ।
