काठमाडौं । चालु आर्थिक वर्षको पहिलो त्रैमासमा नेपाल टेलिकमको नाफा घटेको छ । टेलिकमले चालु आर्थिक वर्षको पहिलो त्रैमाससम्मको अपरिष्कृत वित्तीय विवरण सार्वजनिक गर्दै गतवर्षको तुलनामा यसवर्ष नाफामा १.५२ प्रतिशतले गिरावट आएको जनाएको हो ।
गतवर्ष कम्पनीले असोज मसान्तसम्ममा २ अर्ब २५ करोड ९९ लाख रुपैयाँ नाफा आर्जन गरेको थियो । तर, चालु आर्थिक वर्षको सोही अवधिमा कम्पनीको नाफा १.५२ प्रतिशतले घट्दै २ अर्ब २२ करोड ५५ लाख रुपैयाँमा सिमित भएको छ ।
कम्पनीले सार्वजनिक गरेको वित्तीय विवरण अनुसार कम्पनीको आम्दानी ७.१४ प्रतिशत घटेर ९ अर्ब ७ करोड ७५ लाख रुपैयाँ कायम भएको छ । कम्पनीको अन्य आम्दानी भने समीक्षा अवधिमा ६६.७३ प्रतिशत बढेर १ अर्ब ९६ करोड २५ लाख रुपैयाँ पुगेको छ ।
नाफासँगै चालु आर्थिक वर्षको पहिलो त्रैमाससम्ममा कम्पनीको प्रतिसेयर आम्दानी (ईपीएस)मा पनि गिरावट आएको छ । समीक्षा अवधिमा कम्पनीको यस्तो आम्दानी १० रुपैयाँ ८१ पैसा घटेर ४९ रुपैयाँ ४६ पैसामा झरेको छ । असोज मसान्तसम्ममा कम्पनीको प्रतिशेयर नेटवर्थ ५४० रुपैयाँ ५१ पैसा रहेको छ भने मूल्य आम्दानी अनुपात १६.४८ गुणा रहेको छ ।
