काठमाडौं । नेपाल धितोपत्र बोर्डले मंसिर १८ गते एनआईबिएल म्युचुअल फण्ड अन्तर्गत सञ्चालन हुने पाचौँ योजना ‘एनआईबिएल ग्रोथ फण्ड’ सञ्चालन गर्ने अनुमति दिएको छ ।
नेपाल इन्भेस्टमेन्ट कोष प्रवर्द्धक तथा एनआईबिएल एस क्यापिटल योजना ब्यवस्थापक तथा डिपोजिटरी रहेको यस योजनाको आकार १ अर्ब ६० करोड र समयावधि १० वर्षको रहेको छ । योसँगै अहिलेसम्मकै सबैभन्दा ठूलो म्युचुअल फन्ड योजनाको सार्वजनिक निष्कासन गर्ने म्युचुअल फण्ड योजना हुनेछ । उक्त अवधिभर यस योजनाले वार्षिक प्रतिफलका रुपमा २०।२५ प्रतिशत प्रतिफल आफ्ना इकाइधनीलाई दिनसक्ने प्रक्षेपणसमेत गरेको छ ।
यस योजनाका इकाइहरु नेपाल स्टक एक्सचेन्ज (नेप्से) मा सूचीकृत भई योजनाको समयावधिसम्म दोस्रो बजारमा खरिद तथा बिक्री गर्न सकिने क्यापिटलले जनाएको छ ।एनआईबिएल म्युचुअल फण्ड अन्तर्गत यसअघि नै ३ वटा बन्दमुखी योजना तथा एउटा खुलामुखी योजनासमेत सञ्चालनमा रहेका छन् । ‘एनआईबिएल समृद्धि फण्ड-१’ आफ्नो ७ वर्षे समयावधि पुरा भई परिपक्क भइसकेको र उक्त योजनाले वार्षिक १८ प्रतिशत औसत प्रतिफलसमेत वितरण गरिसकेको छ ।
त्यस्तै अन्य दुई बन्दमुखी योजना एनआईबिएल प्रगति फण्ड र एनआईबिएल समृद्धि फण्ड-२ समेत सञ्चालनमा रहेका छन् । यसका साथै नेपालकै पहिलो खुलामुखी योजना ‘एनआईबिएल सहभागिता फण्ड’ पनि यसै म्युचुअल फण्ड अन्तर्गत सञ्चालनमा रहेको छ । यस योजनाले समेत हालसम्म कुल ६५.४५ प्रतिशत लाभांश वितरण गरी वार्षिक २२ प्रतिशत औसत प्रतिफलसमेत कायम राख्न सफल रहेको छ ।
एनआईबिएल म्युचुअल फण्ड अन्तर्गतका योजनाको इकाइधनीहरुले समुचित प्रतिफल वार्षिक रुपमा प्राप्त गर्दै आइरहेका छन् ।
