काठमाडौं । अमेरिकी सर्ट सेलर ‘हिन्डेनबर्ग रिसर्च’ले सार्वजनिक गरेको ३२ हजार शब्दको रिपोर्टका कारण भारतीय लगानीकर्ताहरुले खर्बौं रुपैयाँ गुमाएका छन् ।
अडानी समूहका कम्पनीहरुललाई उदृत गर्दै हिन्डेनबर्गले तयार पारेको सो रिपोर्टकै कारण सोमबार भारतको समग्र सेयर बजारमा केही सुधार देखिए पनि भारतीय लगानीकर्ताहरुले तीन दिनको कारोबार सेसनमा १ सय १६ खर्ब भारतीय रुपैयाँ गुमाएका छन् ।
हिन्डेनबर्ग रिसर्चले सार्वजनिक गरेको १०० पृष्ठको सो रिपोर्टमा उनले अडानीलाई कर्पोरेट इतिहासकै सबैभन्दा ठूलो ‘ठग’ भएको आरोप लगाएका छन् । उनले सो रिपोर्ट सार्वजनिक गरेलगत्तै अडानी समूहको सेयरहरुमा अस्वभाविक गिरावट आएको थियो ।
अडानी समूहका सेयरहरुमा देखिएको सेलिङ प्रेसरको असर समग्र बजारमै देखिएको थियो । ३ वटा कारोबार सेसनमै ‘बीएसई सेन्सेक्स’ १४०० अंक भन्दा बढीले घटेको छ । यसअवधिमा सेन्सेक्समा सूचीकृत सबै स्टकहरुको बजार पुँजीकरणमा ११६ खर्ब भारु भन्दा बढीले घटेर २६८.६ लाख करोड रुपैयाँमा आएको छ । यसबीचमा, भारतको अर्को बजार सूचक ‘निफ्टी ५०’ ले ३ महिनाको न्यून विन्दु छुँदै १७,५०० अंक भन्दा तलसम्म आएको थियो । हिन्डेनबर्गको रिपोर्टपछि बजारमा सूचीकृत बैंकिङ क्षेत्रको सेयरमा सबैभन्दा ठूलो नोक्सानी भएको छ ।
हिन्डेनबर्गले अडानी समूहका धेरै कम्पनीहरुले ऋण तिर्न प्रयोग गर्न सकिने निःशुल्क नगद प्रवाह उत्पन्न गर्न नसक्ने कुरालाई रिपोर्टमा हाइलाइट गरेपछि लगानीकर्ताहरुले बैंकहरुको स्टक डम्प गरेका छन् । जसका कारण बैंकिङ क्षेत्रमा सबैभन्दा ठूलो गिरावट आएको हो ।
