काठमाडौं । प्रधानमन्त्री पुष्पकमल दाहाल (प्रचण्ड)ले विश्वासको मत पाएका छन् ।

मंगलबारको प्रतिनिधिसभाको बैठकमा विश्वासको मत मागेका प्रचण्डलाई संसदबाट ऐतिहासिक समर्थन मिलेको हो । प्रतिनिधिसभाका २७५ सदस्यमध्ये २६८ जनाले विश्वासको मत दिएका छन् ।

त्यस्तै, नेपाल मजदुर किसान पार्टीका सांसद प्रेम सुवाल र राष्ट्रिय जनमोर्चाका चित्रबहादुर केसीले भने विश्वासको मत दिएनन् । आज संसदमा कुल २७० जनाको उपस्थिति रहेको थियो ।

प्रधानमन्त्री प्रचण्डलाई उनको दल नेकपा माओवादी केन्द्र, नेपाली कांग्रेस, नेकपा एमाले, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी, नेकपा एकीकृत समाजवादी, जनमत पार्टी, लोकतान्त्रिक समाजवादी पार्टी, नागरिक उन्मुक्ति पार्टी, स्वतन्त्र सांसदहरु अमरेशकुमार सिंह, प्रभु साह र योगेन्द्र मण्डलले मत दिएका छन् ।