काठमाडौं । हिमालयन बैंकसँग विलय हुन लागेको सिभिल बैंक लिमिटेडको नाफामा २६.३९ प्रतिशतले वृद्धि भएको छ । चालु आर्थिक वर्षको दोस्रो त्रैमाससम्मको अपरिस्कृत वित्तीय विवरण सार्वजनिक गर्दै बैंकले गतवर्षको तुलनामा नाफामा वृद्धि भएको जनाएको हो ।
सिभिल बैंकले गत आर्थिक वर्षको दोस्रो त्रैमाससम्ममा ५० करोड ४० लाख रुपैयाँ नाफा आर्जन गरेको थियो । तर, चालु आर्थिक वर्षमा बैंकको सो नाफामा २६.३९ प्रतिशतले वृद्धि हुँदै ६३ करोड ७० लाख रुपैयाँ कमाएको छ । समिक्षा अवधिमा बैंकको वितरणयोग्य मुनाफा २५ करोड २२ लाख रुपैयाँ रहेको छ ।
चालु आर्थिक वर्षको दोस्रो त्रैमाससम्ममा बैंकको खुद ब्याज आम्दानी पनि ५३.९० प्रतिशतले बढेको छ भने कुल सञ्चालन आम्दानीमा पनि ३७.४२ प्रतिशतले वृद्धि भएको छ ।
पुस मसान्तसम्ममा बैंकको मूल्य आम्दानी अनुपात १६.६७ गुणा रहेको छ भने प्रतिसेयर नेटवर्थ १ सय ३५ रुपैयाँ ९६ पैसा रहेको छ । समिक्षा अवधिसम्ममा बैंकको निक्षेपमा ०.२३ प्रतिशतले बढेको छ भने कर्जा १.२७ प्रतिशत बढेको छ ।
