">
अन्तराष्ट्रिय । राजनीतिक अस्थिरता र यस वर्ष आएको भिषण बाढीका कारण पाकिस्तानको अर्थतन्त्र धरासायी बनेको छ ।
यतिसम्म कि पछिल्लो समय पाकिस्तानी अर्थतन्त्र श्रीलंकाको भन्दा पनि बिजोग अवस्थामा रहेको विश्लेषकहरुको दाबी छ । पाकिस्तानी अर्थतन्त्रको हरिबिजोग हुनुको मुख्य कारण देशमा लगानीयोग्य पूँजीको अभाव र आर्थिक घाटा बढ्दै जानु हो । यो सँगै पाकिस्तानी रुपैयाँलाई अमेरिकी डलरको भाउले लगातार पछि पारेसँगै पाकिस्तानी अर्थतन्त्र दिनप्रतिदिन बिग्रदै गएको छ ।
आर्थिक विश्लेषकहरुका अनुसार पाकिस्तामा भएको आयातको वृद्धि र निर्यातमा कमी आएसँगै डलरको भाउ आकाशिएको हो । त्यस्तै, पाकिस्तानको व्यापारिक घाटा पनि निरन्तर बढीरहेको छ, जुन देशको अर्थव्यवस्थाका लागि खतरायुक्त हुने जानकारहरु बताउँछन् ।
यसो त आर्थिकमन्दीको चरम सिमामा पुगेको पाकिस्तानले यतिबेला कुनै पनि स्रोतबाट आर्थिक सहयोग वा ऋण पाइरहेको छैन । जसका कारण विदेशी मुद्राकोषमा भारी गिरावट आएको अन्तराष्ट्रिय सञ्चार माध्यमहरुले जनाएका छन् ।
अन्तराष्ट्रिय सञ्चार माध्यमका अनुसार पाकिस्तानले केही महिनाभित्रमा ३० बिलियन अमेरिकी डलर वैदेशिक ऋण चुक्ता गर्नुपर्नेछ । तर, बिग्रदो अर्थतन्त्रकाबीच पाकिस्तानलाई यो ऋण चुक्ता गर्न निकै चुनौति देखिन्छ । तिर्नुपर्ने ऋण तिर्न नसक्दा देश नै ‘डिफल्ट’ हुने बाटोमा जाने आंकलन विश्लेषकहरुले गरेका छन् ।
