काठमाडौं । बुधबार उचित मूल्य नपाएको भन्दै झापाका किसानले उत्पादित कुखुरा र अण्डा सडकमा फालेर विरोध गरे । बिचौलियाका कारण कुखुरा र अण्डा बिक्री नभएको भन्दै बिर्तामोडमा उनीहरुले कुखुरा र अण्डा सडकमै फालेर नाराबाजी गरे । एकैछिन माहोल तात्यो पनि । तर, केहीबेरमा दृश्य फरक देखियो ।
किसानले सरकारको विरोध गर्दै सडकमा फालेका कुखुरा स्थानीयले उठाएर लैजान थाले । सडकको बीचमा फालिएका कुखुरा किसानहरुकै अगाडी स्थानीयले भकाभक लैजान थालेपछि माहोल केही फरक बन्यो ।
विरोध गरेर फालिएका कुखुरा स्थानीयले उठाएर लगेको भिडियो अहिले सामाजिक सञ्जालमा भाइरल छन् । जहाँ कतिपय स्कुले झोरा भिरेरै कुखुरा टिपेका देखिन्छन् भने कतिपयले सवारी साधन रोकेरै कुखुला लगेको देखिन्छन् ।
यो सब देख्दा अचम्म लागेको विरोधमा उत्रिएका एक किसानले बताएका छन् । ‘हामीले उचित मूल्य पाएनौँ भनेर कुखुरा र अण्डा सडकमा फालेर विरोध गर्यौं, तर स्थानीयले हामीले फालेका कुखुरा उठाएर लगे’, ती व्यवसायीले भने, ‘टन्नै कुखुरा फालेका थियौँ, चोकभरी कुखुरा थिए, एकैछिनमा खाली भयो । हामी हेरेको हेर्यै भयौँ ।’
