काठमाडौं । नक्कली म्यानपावर खोली मलेसिया पठाईदिन्छु भन्दै रकम ठगी गर्ने व्यक्ति पक्राउ परेका छन् । जिल्ला मकवानपुर मनहरी गाउँपालिका वडा नं. २ च्यापोल स्थाई घर भई हाल काठमाडौं महानगरपालिका वडा नं. १४ गाईबाच्छा टोल बस्ने २८ वर्षीय आदेश तामाङ पक्राउ परेका हुन् ।
उनले ‘KHM Recuirement Group’ को नामबाट संचालन गरेको म्यानपावरबाट रबिन मोक्तान सहित १०० जनालाई वैदेशिक रोजगारीका लागि मलेसिया पठाईदिने भन्दै रकम ठगी गरेको प्रहरीले जनाएको छ । तामाङलाई काठमाडौं उपत्यका अपराध अनुसन्धानबाट खटिएको प्रहरी टोलिले मिति २०७९/११/२४ गते मिनभवन बानेश्वरबाट पक्राउ गरेको हो ।
प्रहरीले किर्तिपुरस्थित उनले संचालन गरेको म्यानपावरमा खानतलासी गर्दा विभिन्न व्यक्तिका ९० थान पासपोर्ट, कम्पनीको छाप र विभिन्न कागजात बरामद गरेको छ । पक्राउ परेका तामाङलाई भने ठगी सम्बन्धी कसुरमा आवश्यक कारवाहीका लागी जिल्ला प्रहरी परिसर टेकु, काठमाडौं पठाईएको प्रहरीले जनाएको छ ।
