काठमाडौं । राष्ट्रिय स्वतन्त्र पार्टीका सभापति रवि लामिछानेले आफ्नो पार्टी तत्काल सरकारमा जाने तयारीमा नरहेको बताएका छन् । सोमबार पत्रकारसँग कुराकानी गर्दै रविले तत्कालै राष्ट्रिय स्वतन्त्र पार्टी सरकारमा जाने तयारीमा नरहेको बताएका हुन् ।
अहिले परिस्थितिको मूल्याङ्कन गर्ने काम भइरहेको भए पनि सरकारमा जाने तयारी नरहेको रविले बताए । ‘सरकारमा जाने तयारी भन्ने होइन । परिस्थितिलाई मूल्याङ्कन गर्नुपर्ने हुन्छ ।’ उनले भने- ‘सत्ता समीकरण परिवर्तन भए पछि सरकारमा जानु परेमा कारण स्पष्ट पारेर मात्रै सहभागी हुनेछौँ । तर, अहिले सरकारमा जाने नजाने भन्ने विषयमा पार्टीभित्र छलफल भएको छैन ।’
रास्वपा छुट्टै परिचय बोकेर बनेको दल भएकाले पछिल्ला राजनीतिक घटनाक्रम नियाल्दै गरेको रविको भनाई छ । आफ्नो दलको राजनीतिक अभ्यास सुरुआती चरणमा रहेको बताउँदै रविले सरकारलाई दिएको समर्थन फिर्ता नलिएको अवस्थामा अब के गर्ने भन्ने विषयमा पार्टीभित्र छलफल हुने बताएका छन् ।
त्यस्तै, आगामी वैशाख १० गते हुने चितवन क्षेत्र नम्बर २ को उपनिर्वाचनको तयारी सुरु गरेको समेत उनले बताएका छन् ।
