काठमाडौं । राष्ट्रिय प्रजातन्त्र पार्टी (राप्रपा)का सांसद ज्ञानेन्द्र शाहीले खेलाडीका लागि आफ्नो तलबबाट रकम छुट्याउने घोषणा गरेका छन् ।

मंगलबार प्रतिनिधिसभाको बैठकलाई सम्बोधन गर्दै सांसद शाहीले आफ्नो तलबबाट मासिक ३ हजार रुपैयाँ नेपालका खेलाडीका लागि छुट्याउने घोषणा गरेका हुन् ।

सोही क्रममा सांसद शाहीले संसदबाटै प्रदेश संरचना खारेजीको मागसमेत गरेका छन् । ‘यो देशका लागि प्रदेश संरचना आवश्यक छैन, प्रदेश सरकार खारेज गरेर सांसदको संख्या १ सय ६५ बाट १ सय ५ जना प्रत्यक्ष बनाउँ ।’, उनले भने, ‘यो देशमा २ सय ७५ सांसदको आवश्यकता छैन ।

त्यस्तै, सांसद शाहीले प्रत्येक सांसदको तलबबाट ३ हजार मात्रै छुट्याउने हो भने खेलाडीका लागि प्रश्स्त पुग्ने दाबी गरेका छन् । ‘८ सय ८४ जना सांसदले १ सांसद बराबर ३ हजार रुपैयाँ यदी खेलाडीलाई दिने हो भने २६ लाख ५२ हजार रुपैयाँ खेलाडीले पाउँछन् ।’, उनले भने, ‘आजबाट म घोषणा गर्छु, मेरो हरेक महिनाको तलबबाट ३ हजार रुपैयाँ खेलाडीका लागि खर्च गर्छु ।’