काठमाडौँ । लामो समय म्याक्स मिडियासँग बिज्ञापन प्रकाशन / प्रशारणका लागि एजेन्सी-क्लाइण्टका रुपमा काम गरेर त्यसपछि आउट रिच नेपालसँग सहकार्य गर्न गएको एनसेलले एक बर्षमै आउटरिच नेपालसँगको सम्बन्ध तोडेको छ । सोचेअनुसार काम नभएको र एजेन्सीका कर्मचारीले संचारमाध्यमका साहुहरुलाई नै थर्काएको विषयमा पटक पटक गुनासो पुगेपछि एनसेलले आउटरिच नेपालसँग सहकार्य नगर्ने र थप ३ एजेन्सीहरु छान्ने गरी बिडिङ प्रक्रिया थाल्नेगरी निर्णय गरेको थियो । यसै अनुसार विभिन्न विज्ञापन एजेन्सीहरुले एनसेलको काममा बिड गरेका थिए ।
एनसेलका एक उच्च अधिकारीले दिएको जानकारी अनुसार आउटरिचलाई सो बिड प्रक्रियामा सहभागीता नै गराइएको थिएन । ‘हामीले आउटरिच नेपालसँग सहकार्य तोड्नेगरी नै नयाँ बिडिङ गरेका थियौं । यो तथ्य थाहा पाएर नै होला, आउटरिच नेपालले सो प्रक्रियामा सहभागी नै भएन ।’ ती अधिकारीका अनुसार अहिले एनसेलका लागि ३ एजेन्सीहरु छानिएका छन् । एडि रिलिज, अभानी एडभरटाइजिङ र एएनएस को. छानिएका छन् ।
‘लामो समय म्याक्स मिडियासँग काम गरियो । म्याक्सको काम चित्तबुझ्दो नै थियो, तर अप्सन पनि राख्नुपर्छ भनेर हामीले आउटरिच नेपालसँग सहकार्य गर्ने निर्णय गरेका थियौँ । तर आउटरिचको काम सन्तोषजनक नभएपछि हामीले थप ३ एजेन्सीलाई विकल्पमा राखेर काम गर्ने निर्णय गरेका छौँ ।’ एनसेलका ती अधिकारीले भने -‘अवको केहि दिनमा एनसेलको नयाँ काम नयाँ एजेन्सीहरुले गर्नेछन् ।’
एनसेल र मिडियाबीच सम्बन्ध सुधारका लागि पटक पटक कुराकानी भए पनि आउटरिच नेपालका कर्मचारी सुजित सिंहले मिडियाकर्मीप्रति दुर्व्यवहारजनक सम्बाद गरेको भन्दै एनसेलमा मौखिक उजुरीसमेत परेको थियो ।
