">
काठमाडौं । सनराइज बैंकले नेपाल प्रहरी विद्यालयमा अध्ययनरत १५ जना जेहेन्दार विद्यार्थीहरुलाई करिब ७० लाख रुपैयाँको छात्रवृत्ति उपलब्ध गराएको छ । संस्थागत सामाजिक उत्तरदायित्व अन्तर्गत ६९ लाख ८० हजार ६३४ रुपैयाँ छात्रवृति रकम सहयोग गरेको बैंकले जनाएको छ ।
नेपाल प्रहरी प्रधान कार्यलय नक्सालमा बुधबार भएको कार्यक्रममा छात्रवृत्ति सम्बन्धी समझदारी पत्रमा सनराइज बैंकका नायब महाप्रबन्धक रविनकुमार नेपाल र नेपाल प्रहरीका वरिष्ठ उपरीक्षक केदार ढकालले हस्ताक्षर गरे ।
नेपाल प्रहरीका विभिन्न ८ वटा विद्यालयमा अध्ययन गर्ने बहालवाला, अवकाश प्राप्त, अमर शहीद एवम् अशक्त प्रहरीका जेहेन्दार सन्ततिहरुलाई उत्प्रेरणा गर्ने उद्देश्यले छात्रवृत्ति रकम प्रदान गरेको बैंकले जनाएको छ । बैंकले उपलब्ध गराएको छात्रवृत्ति रकम १५ जना विद्यार्थीहरुले कक्षा ४ देखि १२ सम्मको अध्ययनमा खर्चिने छन् ।
कार्यक्रममा बैंकका प्रमुख कार्यकारी अधिकृत सुमन शर्माले छात्रवृत्ति रकमले ती विद्यार्थीहरुको अध्ययनमा थप प्रेरणा मिल्ने विश्वास व्यक्त गरे ।
सम्झौता कार्यक्रममा बैंकका नायब प्रमुख कार्यकारी अधिकृत आरती राज्यलक्ष्मी राणा, नायब महाप्रबन्धक रविनकुमार नेपाल, नेपाल प्रहरीका महानिरीक्षक बसन्तबहादुर कुंवर लगायतको सहभागिता रहेको थियो ।
