काठमाडौं । प्रधानमन्त्री पुष्पकमल दाहाल (प्रचण्ड)ले आफ्नो कार्यकालको अन्तिमसम्म देशको राजनीति र अर्थतन्त्र सुध्रिने दाबी गरेका छन् । पूर्व प्रमुख निर्वाचन आयुक्त डा.अयोधीप्रसाद यादवद्वारा लिखित ‘गोठालादेखि प्रमुख निर्वाचन आयुक्तसम्म आत्मवृत्तान्त’ पुस्तकको लोकार्पण गर्दै प्रधानमन्त्री प्रचण्डले यस्तो दाबी गरेका हुन् ।
अहिले विश्वव्यापी रुपमा देखिएको मन्दिको प्रभाव नेपालमा पनि देखिएको र अर्थतन्त्र केही संकटमा रहेको बताउँदै प्रधानमन्त्री प्रचण्डले आफ्नो कार्यकालको अन्त्यसम्म अर्थतन्त्र सुध्रिने बताएका छन् ।
‘अहिले अर्थतन्त्रमा क्रमशः सुधार आउँदैछ । समष्टिगत आर्थिक परिसूचकहरू सकारात्मक छन् । विदेशी मुद्राको सञ्चिति त उत्साहजनक नै छ । अरू क्षेत्रमा पनि राम्रो प्रगति हुँदैछ ।’, उनले भने, ‘तेस्रो कार्यकालको अन्तिमसम्म जाँदा दोस्रोभन्दा राम्रो नतिजा आउँछ भन्नेमा म विश्वस्त छु ।’
त्यस्तै, उनले आन्दोलनरत दलहरूमा भएको सहमतिको प्रक्रियाले अर्थतन्त्रमा सुधार आएको जिकिर गरेका छन् । ठूला आयोजनाहरूमा भौतिक र वित्तीय प्रगति राम्रो भएको भन्दै यसपटक पनि त्यसभन्दा राम्रो गर्ने प्रयास भइरहेको उनको भनाई रहेको छ ।
