काठमाडौं । मानुषी लघुवित्त वित्तिय संस्था लिमिटेडको चौथो वार्षिक साधारणसभा सम्पन्न भएको छ । लघुवित्तको साधारण सभा जेठ ३२ गतेका दिन संस्थाकि अध्यक्ष पद्मासना शाक्यको अध्यक्षतामा सफलतापूर्वक सम्पन्न भएको हो ।

सभामा सञ्चालक समितिको तर्फबाट अध्यक्षले आर्थिक वर्ष २०७८/०७९ को वार्षिक प्रतिवेदन प्रस्तुत गरेकी थिइन् । सभामा वक्ताहरुले विश्व अर्थतन्त्र कोभिड पश्चात विस्तारै लयमा फर्कने संकेत भइरहेकोमा विश्व अर्थतन्त्रमा चुनौति थपिएको र हाम्रो देशको सन्दर्भमा विशेष गरी तरलताको संकटले ब्यवसाय चुनौतिपूर्ण भए पनि नियामक निकायले लिएको विभिन्न कदमहरुका कारणले आर्थिक वर्ष २०७८/०७९ मा सहज हुँदै गएको तर पछिल्लो समय लघुवित्त माथि चौतर्फी आक्रमण हुँदा थपिएको चुनौतिका विषयमा बोलेका थिए ।

आर्थिक वर्ष २०७८/०७९ मा संस्थाको सबै वित्तिय सूचाङ्कहरु उत्साहप्रद रहेको छ । सोही आर्थिक वर्षमा आइपिओ जारी गरी संस्थाले चुक्ता पुँजी १० करोड ९३ लाख ७५ हजार रुपैयाँ पुर्याएको थियो । साथै, आर्थिक वर्ष २०७८/०७९ मा संस्था कूल १ करोड ७२ लाख ३७ हजार १ सय ५ रुपैयाँ नाफा आर्जन गर्न सफल भएको छ ।

सभाले संस्थाको सञ्चालक समितिको तर्फबाट प्रस्तुत सम्पूर्ण प्रस्तावहरु उपर छलफल गरि सर्वसम्मतिले अनुमोदन गरेको थियो ।