काठमाडौं । नेशनल लाइफ इन्स्योरेन्स कम्पनी लिमिटेडको ३५औं वार्षिक साधारणसभा जेठ २२ गते कम्पनीको अध्यक्ष प्रेमा सिंहको अध्यक्षतामा सफलतापूर्वक सम्पन्न भएको छ ।
सभामा अध्यक्षले विश्व अर्थतन्त्र कोभिड पश्चात विस्तारै लयमा फर्कने संकेत भइरहेकोमा विश्व अर्थतन्त्रमा चुनौति थपिएको र हाम्रो देशको सन्दर्भमा विशेष गरी तरलताको संकटले बीमा ब्यवसाय चुनौतिपूर्ण भए पनि नियामक निकायले लिएको विभिन्न कदमहरुका कारणले आर्थिक वर्ष २०७८/७९ मा बीमाको पहुंचमा उल्लेखनीय बृद्धि भएको र नेपाल सरकार र नियामक निकायको सहयोगात्मक नीतिहरुका कारणले गर्दा बीमा बजार आउने दिनहरुमा थप फस्टाउने आशा गरेकी थिइन् ।
३५औं वार्षिक साधारण सभाले आर्थिक वर्ष २०७८/७९ को लागि अद्यावधिक चुक्ता पूँजीको ८ प्रतिशत बोनस सेयर जारी गर्ने र सो बोनस सेयर वापतको कर प्रयोजनको लागि १ करोड ९५ लाख ३८ हजार ६ सय ६१ रुपैयाँ र नगद लाभांश प्रदान गर्ने प्रस्ताव पारित गरेको छ ।
उक्त लाभांशको अतिरिक्त चुक्ता पूँजीमा ६.५ प्रतिशतको दरले थप नगद लाभांश प्रदान गर्ने प्रस्ताव पारित भएको छ । नियामक निकायले जीवन बीमा कम्पनीको चुक्ता पूँजी ५ अर्व पुर्याउनु पर्ने वाध्यात्मक व्यवस्था गरेकोमा हालको कायम रहेको चुक्ता पूँजी ४ अर्व ६४ करोड ४ लाख ३१ हजार ८ सय ७५ रुपैयाँमा ८ प्रतिशतको वोनस शेयर थप भई कूल चुक्ता पूँजी ५ अर्व १ करोड १६ लाख ६६ हजार ४ सय २५ रुपैयाँ पुगेको छ र तोकिएको चुक्ता पूँजी सहज रुपमा पूरा भएको छ ।
सभामा अध्यक्षले आउने दिनहरुमा नेशनल लाईफ इन्स्योरेन्स कम्पनी एक मूख्य बीमकको रुपमा आम सर्व साधारणको जीवन बीमाको आवश्यकता परिपूर्ती गर्नमा अग्रणी भूमीका निर्वाह गरिरहने विश्वास व्यक्त गरिन् ।
