काठमाडौं । नेपाल धितोपत्र बोर्डका अध्यक्ष रमेश हमालले पूँजी बजार सुधारमा ‘कोषेढुंगा’ साबित हुन्छ भनिएको स्टक लाइसेन्सको प्रक्रिया छिट्टै अघि बढ्ने दाबी गरेका छन् । अर्थ सरोकारको टेलिभिजन कार्यक्रम ‘मार्केटक टक’मा बोल्दै उनले तत्कालका लागि रोकिएको उक्त प्रक्रिया पुनः सुरु हुने दाबी गरेका हुन् ।

नयाँ ब्रोकर, स्टक एक्सचेन्ज र कमोडिटी एक्सचेन्ज ल्याउने काम बजारको भविष्य सुनिश्चितताका लागि गर्नैपर्ने भएकोले ढिलोचाँडो निरन्तरता पाउने अध्यक्ष हमालले बताए । ‘बजारको भविष्य सुनिश्चितताका लागि यो एकचोटी गर्नैपर्ने हुन्छ । कति चाँडो हुन्छ भन्ने कुरामा प्रश्न उठ्न सक्छ । तर, यो गर्दै नगर्ने भन्ने चाहिँ होइन । अहिलेको सरकारको निर्देशन पनि केही समय रोकेर हेरौँ भन्ने हो, गर्दै नगर्ने भन्ने होइन ।’

त्यस्तै, अध्यक्ष हमालले आफूले अघि बढाएको लाइसेन्स वितरणको प्रक्रिया पूर्ण रुपमा स्वच्छ र पारदर्शी भएको बताएका छन् । नयाँ ब्रोकर, स्टक एक्सचेन्ज र कमोडिटी एक्सचेन्जको लाइसेन्स दिने कुरा पूर्ण रुपमा बजारको भविष्यका लागि भएको र बाहिर चलेको हल्लाजस्तो यसमा कुनै पनि स्वार्थ नभएकोले यो स्टक लाइसेन्सको प्रक्रिया कुनै पनि हालतमा सुरु हुने अध्यक्ष हमालले बताएका छन् ।

पूँजी बजारको वर्तमान अवस्था र समसामयिक विषयमा गरिएको संवादको पूणै अंश भिडियोमा हेर्नुहोस्ः