काठमाडौं । राष्ट्रिय सहकारी बैंक लिमिटेडले गण्डकी प्रदेशका १७ वटा सहकारी संस्थालाई पुरस्कृत गरेको छ ।
गत पुसमा सम्पन्न बैंकको १६औं वार्षिक साधारणसभामा विभिन्न विधामा पुरस्कारका लागि छनोट भएका सहकारीहरुलाई सोमबार पोखरामा आयोजित कार्यक्रममा पुरस्कृत गरिएको हो । सहकारी विभागका रजिष्ट्रार नमराज घिमिरे र बैंकका अध्यक्ष के.बी.उप्रेतीले पुरस्कृत संस्थाका पदाधिकारीहरुलाई प्रशंसापत्र सहित पुरस्कार प्रदान गरेका हुन् ।
पुरस्कृत हुने संस्थाहरुमा महिलाद्वारा सञ्चालित सहकारी मध्ये राष्ट्रिय स्तरको पुरस्कार शिवमन्दिर महिला बहुउद्देश्यीय सहकारी संस्था लिमिटेड कावासोतीलाई प्रदान गरिएको थियो ।
यस्तै, प्रदेश स्तरमा उत्कृष्ट हुने वचत तथा ऋण सहकारी मध्येबाट फेवा वचत तथा ऋण सहकारी सस्था लिमिटेड पोखरा र वचत तथा ऋण बाहेकका सहकारी मध्येबाट सयपत्री बहुउद्देश्यीय सहकारी संस्था लिमिटेड गलकोट बागलुङलाई पुरस्कृत गरिएको छ । आर्थिक वर्ष २०७८/०७९ माबैंकसंग उत्कृष्ट र नियमित कारोबार गर्ने संस्थाहरु मध्ये शाखा स्तरीय पुरस्कारबाट दमौली शाखामा उत्कृष्ट कारोबार गर्ने भिमाद वचत तथा ऋण सहकारी संस्था लिमिटेड भिमाद तनहुँ र नियमित कारोबार गर्ने विधामा शिवकालिका वचत तथा ऋण सहकारी संस्था लिमिटेड ब्यास–२, तनहुँ पुरस्कृत भएका छन् ।
यस्तै, पोखरा शाखामा उत्कृष्ट कारोबार गर्ने दुधपोखरी वचत तथा ऋण सहकारी संस्था लिमिटेड कास्की र नियमिततर्फ द गोर्खाज वचत तथा ऋण सहकारी संस्था लिमिटेड कास्कीलाई पुरस्कृत गरिएको छ भने वालिङ शाखामा उत्कृष्ट कारोबार गर्ने मिलन वचत तथा ऋण सहकारी संस्था लिमिटेड वालिङ, स्याङ्जा र नियमिततर्फ बोलबम बहुउद्देश्यीय सहकारी संस्था लिमिटेड वालिङ स्याङ्जालाई पुरस्कृत गरिएको थियो ।
बागलुङ शाखामा उत्कृष्ट कारोबार गर्ने बेनी वचत तथा ऋण सहकारी संस्था लिमिटेड म्याग्दी र नियमिततर्फ साझा चौतारी युवा उद्यमशिल सहकारी संस्था लिमिटेड बागलुङ पुरस्कृत भएका छन् । यस्तै, पुतलीबजार शाखामा उत्कृष्ट कारोबार गर्ने सुर्योदय वचत तथा ऋण सहकारी संस्था लिमिटेड पुतलीबजार स्याङ्जा र नियमित तर्फ जयजनता बहुउद्देश्यीय सहकारी संस्था लिमिटेड पुतलीबजार स्याङ्जा पुरस्कृत भएका छन् ।
तालचोक शाखामा उत्कृष्ट कारोबार गर्ने लेखनाथ वचत तथा ऋण सहकारी संस्था लिमिटेड पोखरा–२६ कास्की र नियमिततर्फ लेखनाथ सामुदायिक वचत तथा ऋण सहकारी संस्था लिमिटेड पोखरा–२७ कास्की पुरस्कृत भएका छन् । कावासोती शाखामा उत्कृष्ट कारोबार गर्ने मध्यनेपाल वचत तथा ऋण सहकारी संस्था लिमिटेड देवचुली नवलपुर र नियमिततर्फ सिर्जनशिल वचत तथा ऋण सहकारी संस्था लिमिटेड कावासोती नवलपुर पुरस्कृत भएका छन् ।
बैंकका संस्थापक अध्यक्ष स्वर्गीय राजेशहरि जोशीको नाममा स्थापना गरिएको संस्थापक अध्यक्ष/सञ्चालक सम्मानबाट गण्डकी वचत तथा ऋण सहकारी संस्था गैडाकोट नवलपुरका गोविन्द सुवेदीलाई नगद २५ हजार सहित सम्मान गरिएको थियो । बैंकले प्रवाह गर्ने कर्जा कारोबारमा उत्कृष्ट संस्थाहरु मध्येबाट मिलिजुली महिला बहुउद्देश्यीय सहकारी संस्था लिमिटेड कावासोती नवलपुरलाई उत्कृष्ट ऋणी संस्था (ग्रीनकार्ड) प्रदान गरिएको थियो ।
बैंकले विभिन्न सामुदायिक विद्यालयहरुमा गठन गरेका बालक्लवका विद्यार्थीहरुबीच सञ्चालन गरेको वित्तीय साक्षरतामा सहकारीको भूमिका विषयक निवन्ध लेखन प्रतियोगितामा देशभरका सहभागी मध्ये द्वितिय हुने आदर्श माध्यमिक विद्यालय पोखरा-२७ कास्कीका छात्रा सदिक्षा सुवेदीलाई नगद १० हजार सहित पुरस्कृत गरिएको बैंकका सञ्चालक एवम् शिक्षा, तालिम तथा सम्मान उपसमितिका संयोजक माधवलाल देवकोटाले जानकारी दिएका थिए ।
बैंकका अध्यक्ष केबी उप्रेतीको अध्यक्षता, सञ्चालक तथा गण्डकी प्रदेशका संयोजक राम बहादुर जिसीको सञ्चालन र पोखरा महानगरपालिका सहकारी समितिका अध्यक्ष रविरमण तिवारीको स्वागतमा कार्यक्रम सम्पन्न भएको थियो ।
