काठमाडौं । कुनैबेला एसएलसीमा फेल भएको एउटा ठिटोले चार्टड एकाउन्टेन्सी पास गर्यो भन्दा धेरैलाई पत्यार नलाग्न सक्छ । अझ त्यसमा पनि एसएलसीमा गणितमा फेल भएको मान्छे, पुरक परिक्षामा पनि उही गणित पास गर्न नसकेको मान्छेले अहिले सिएजस्तो कठिन मानिएको विषय पास गर्यो भन्दा धेरैलाई अचम्म लाग्न सक्छ । तर यो सत्य हो । गुल्मी स्थायी घर भएका चन्द्रमणि अर्यालले अन्ततः सिए पास गरेका छन् ।
एसएलसीमा गणित र विज्ञान विषय लागेर फेल भएका, पुरक परिक्षामा समेत पास हुन नसकेका र अर्कोपटक एसएलसी कटाएका अर्यालले कक्षा ११मा समेत बाबु बितेका कारण ३ वटा परिक्षा हाप्नु परेको थियो । सरकारी विद्यालयको पृष्ठभूमि भएकै कारण अंग्रेजीमा समेत कमजोर रहेका अर्यालले अन्तत दी इन्स्टिच्युट अफ चार्टड एकाउन्टेन्ट्स अफ इण्डिया (आइसीएआई)बाट सिए उतिर्ण गरेका छन् । एसएलसीमा फेल भएपछि जीवन नै सकियो भनेजसरी निराश भएकाहरुका लागि वा प्लस टु वा कुनै पनि परिक्षामा राम्रो अंक आएन भनेर निराश भएकाहरुका लागि उनी प्रेरणाका स्रोत बन्न सक्छन् । फलामको च्युरा चपाएजस्तो मानिने कोर्स पास गरिछाडेका उनले जीवनमा गर्न नसकिने के रहेछ र भन्ने तथ्यलाई पुनः एकपटक प्रमाणित गरिदिएका छन् । निरन्तरको लगनशीलता र गर्छु भन्ने अठोट भए, बाटोमा लाग्ने अनेकन चोटहरु फगत यात्राका साक्षी मात्र हुने रहेछन्, अर्यालको जीवन संघर्षका अनेकन अध्यायले सिकाएको अभूतपूर्व पाठ यहि हो ।
चन्द्रमणि अर्यालले बिक्रम सम्बत २०६६ सालमा एसएलसी दिए, तर दुई विषयमा फेल भए । त्योबेला दुई बिषयमात्र फेल हुनेले पुनः परिक्षा दिन पाउँथ्यो । तर पुरक परिक्षामा पनि उही गणित र विज्ञान विषयले माया मार्यो । त्यसपछि उनले अर्को बर्ष परिक्षा दिए, सेकेन्ड डिभिजनमा पास भए । कम अंक आएकै कारण राम्रा कलेजले उनलाई पत्याएन, भर्ना गर्न मानेन । र पनि पावर नै लगाएर भए पनि उनी काठमाडौँस्थित ट्रिनिटी कलेजमा भर्ना भए । कक्षामा सबैजसो स्कुल टपरहरु थिए । र त आफ्नो अंकले कताकता आफैंलाई बिझाएझैं हुन्थ्यो उनलाई । त्यसैले पनि, उनी आफ्नो मार्कशिट कसैलाई देखाउँदैनथिए । साथीहरु नभएको बेला पारेर परिक्षाको फर्म भर्थे । कक्षा ११ को परिक्षा दिने बेला बाबु बितेपछि उनले ११ कक्षामा पनि ३ वटा परिक्षा छोड्नुपर्यो । तर मनमा आँट भएपछि र गर्छु भन्ने विश्वास भएपछि नसकिने केहि रहेनछ । उनले कक्षा १२ र छुटेको ११ कक्षाका परिक्षा पनि सबै पास गरे ।
प्लस टु पछि के गर्ने ? उनी दोधारमा थिए । कताकता सिएका बारे सुनेछन् चन्द्रमणिले र आफ्ना दाजुलाई सुनाए, म सिए पढ्छु भनेर । दाजुले सिएको कोचिङ्गमा भर्ना गरिदिएपछि उनी प्रायः धेरैले असम्भव सोचेको यात्रामा होमिए । सरकारी स्कुलको पृष्ठभूमि भएकाले अंग्रेजी गाह्रो हुने नै भयो । गणित त एसएलसीमै फेल भएको यसै गाह्रो हुने नै भयो । तर पढ्दै गर्दा उनले बुझे, म एसएलसीमा नपढेरै फेल भएको रहेछु । अंग्रेजी मात्र गाह्रो रहेछ, गणित त मेरो नशानशामा रहेछ । हुन त सिएको पढाई पनि सहज भएन । साँढे ४ बर्षको कोर्स सक्न ७ बर्ष लाग्यो, कतिपटक फेल भईयो, र पनि इतिहास दर्ज गरेरै छोडे चन्द्रमणिले । र आज उनी गर्वका साथ भनिरहेका छन्, ‘जीवनमा लगनशीलता भए नसकिने केहि रहेनछ, प्रमाण म स्वयम् यहीँ छु ।’
बाँकी भिडियोमा:
