काठमाडौँ । अष्ट्रेलिया पठाउने भन्दै लाखौँ रुपैयाँ ठगी गर्ने एकजना पक्राउ परेका छन् । सोझा नेपालीलाई फकाइफुल्याई गरी ‘वर्किङ भिसा’मा अष्ट्रेलिया पठाउने भन्दै १७ लाख रुपैयाँ ठगी गर्ने काठमाडौंको शंखमूलस्थित फल्याइङ ट्याप एजुकेशन एण्ड इमिग्रेसन कन्सलटेन्टका सञ्चालक ४५ वर्षीय विष्णु केसी पक्राउ परेका हुन् ।
केसीले अर्घाखाँची घर भई हाल भक्तपुरको सूर्यविनायक नगरपालिका बस्दै आएका पवनराज दाहाललाई अष्ट्रेलिया पठाउने भन्दै रकम ठगी गरेका थिए । उनले ‘वर्किङ भिसा’मा अष्ट्रेलिया पठाउने भन्दै दाहालबाट १७ लाख ७९ हजार रुपैयाँ ठगी गरेको प्रहरीले जनाएको छ ।
यसो त पक्राउ परेका केसीले सुरुमा मासिक २ लाख भन्दा बढी कमाई हुने कम्पनीमा पठाउने भन्दै दाहालसँग १६ लाख रुपैयाँ मागेका थिए । तर, दाहालले भने पटकपटक गरी केसीलाई १७ लाख बढी रकम बुझाएको प्रहरी अनुसन्धानबाट खुलेको छ ।
प्रहरीका अनुसार केसीले दाहाललाई अष्ट्रेलियामा जाने भन्दै भिसासमेत दिएका थिए । तर, उक्त भिसा नक्कली भएको भन्दै त्रिभुवन अन्तराष्ट्रिय विमानस्थलको अध्यागमन कार्यालयले फिर्ता पठाएपछि उनले आफू ठगीमा परेको थाहा पाएका थिए । त्यसपछि उनले प्रहरीमा आफू ठगिएको भन्दै उजुरी दिएका हुन् । सोही उजुरीका आधारमा प्रहरीले केसीलाई पक्राउ गरेको हो । हाल पक्राउ परेका केसीमाथि थप अनुसन्धान भइरहेको प्रहरीले जनाएको छ ।
