काठमाडौं । वैदेशिक रोजगारीका लागि विदेश पठाइदिने भन्दै रकम ठगी गर्ने तीन जनालाई प्रहरीले पक्राउ गरेको छ । उनीहरुलाई काठमाडौँ उपत्यका अपराध अनुसन्धान कार्यालयको टोलीले पक्राउ गरेको हो ।
धादिङको ज्वालामुखी गाउँपालिका-१ घर भई हाल भक्तपुरको ठिमी नगरपालिका-३ बस्ने ४० वर्षीय राजकुमार लामिछाने, कैलालीको लम्कीचुहा नगरपालिका-५ घर भई हाल काठमाडौँ महानगरपालिका-२६ मित्रनगर नयाँ बसपार्क बस्ने २३ वर्षीय चित्रबहादुर मगर तथा स्याङ्जाको वालिङ नगरपालिका-१२ घर भई हाल काठमाडौँ महानगरपालिका-४ सुकेधारा बस्ने ४९ वर्षीय वीरबहादुर गुरुङ पक्राउ परेका हुन् ।
बिर बहादुर गुरुङले राज भक्त रानाभाटलाई फ्रान्स पठाईदिने भन्दै १४ लाख ठगी गरेका थिए भने चित्र बहादुर मगरले निशान खड्कालाई टर्की पठाईदिने भन्दै २ लाख ५० हजार ठगी गरी सम्पर्क विहिन भएका थिए । त्यस्तै, राज कुमार लामिछानेले बलराम थापा मगर सहित ३ जनालाई सर्बिया पठाईदिने र सर्बिया पुगेपछि चकलेट प्यकिङ्गमा काम लगाईदिन्छु मासिक १ लाख ५० हजार तलब हुन्छ भनि विश्वास दिलाई प्रलोभनमा पारेर पिडितहरुबाट १७ लाख ठगी गरेका थिए ।
ठगी गरेको उजुरीका आधारमा तीनै जनालाई पक्राउ गरिएको हो । उनीहरुलाई काठमाडौँका विभिन्न स्थानबाट पक्राउ गरी थप अनुसन्धान तथा कारबाहीका लागि वैदेशिक रोजगार विभाग ताहाचल, काठमाडौँ पठाइएको प्रहरीले जनाएको छ ।
