काठमाडौं । सिटिजन्स बैंकको १७ औं वार्षिक साधारण सभा सम्पन्न भएको छ । सो सभा काठमाडौंको डिल्लीबजार स्थित अमृतभोगमा सम्पन्न भएको हो ।
बैंकले आर्थिक वर्ष २०७९-८०को मुनाफाबाट हाल कायम चुक्ता पुँजीको ५ दशमलव ७९ प्रतिशत नगद लाभांश बितरण गर्ने प्रस्ताव गरेको छ । सभाले उक्त प्रस्ताव अनुमोदन गरेको हो ।
त्यस्तै, सभाले आर्थिक वर्ष २०७९-८०को सञ्चालक समितिको वार्षिक प्रतिवेदनमाथि छलफल गरी पारित गरेको छ । लेखापरीक्षकको प्रतिवेदन सहित २०८० आषार मसान्तको बैंक तथा बैंकको सहायक कम्पनीहरु सहितको एकीकृत वासलात मिति २०७७-०४-०१ देखि २०८०-०३-३१ सम्मको नाफा नोक्सानको हिसाब तथा सोही अवधिको नगद प्रवाह विवरण लगायतका वित्तीय विवरणहरुमाथि छलफल गरी पारित गरेको हो ।
सो सभाले कम्पनी ऐन २०६३को दफा १११ अनुसार आर्थिक वर्ष २०८०-८१को लेखापरीक्षण गर्न लेखापरीक्षण समितिको सिफारिसमा लेखापरीक्षकको नियुक्ति गर्ने तथा निजको पारिश्रमिक निर्धारण गर्ने कम्पनी ऐन २०६३ को दफा १११ ३ बमोजिम बहालवाला लेखापरीक्षक जेके एण्ड एसएस एसोसिएटस्, चार्टड एकाउन्टेन्टस् पुनः नियुक्त हुन योग्य हुने प्रस्ताव पारित गरेको छ । साथै, बैंकको नियमावली अनुसार समूह ‘क’का संस्थापक सेयरधनीहरुको तर्फबाट प्रतिनिधित्व गर्ने सञ्चालक पद ३ र समूह ‘ख’का सर्वसाधारण सेयरधनीहरुको तर्फबाट प्रतिनिधित्व गर्ने सञ्चालक पद १ जना निर्वाचन गर्ने प्रस्ताव पारित गरेको हो ।
उक्त सभाले सिटिजन्स बैंक इन्टरनेसनल लिमिटेड र अन्य उपयुक्त बैंक तथा वित्तीय संस्थाहरु एक आपसमा गाभ्ने र गाभिने मर्ज गर्न वा प्राप्ति एक्विजिसन गर्न तथा वैदेशिक रणनीतिक साझेदारीमा जान उपयुक्त देखिएमा बैंकको चलअचल सम्पत्ति र दायित्त्व कारोवारको मूल्याङ्कन गर्न राष्ट्रिय तथा अन्तराष्ट्रिय मान्यता प्राप्त मूल्याङ्कनकर्ता नियुक्ति गर्न प्रस्ताव पारित गरेको छ ।
साथै, गाभ्ने, गाभिने वा प्राप्ति गर्ने सम्बन्धी प्रारम्भिक तथा अन्तिम सम्झौता गर्न र सो प्रक्रिया पुरा गर्न आवश्यक पर्ने सम्पूर्ण कार्य गर्नको लागि सञ्चालक समितिलाई अख्तियारी प्रदान गर्ने लगायतका प्रस्ताव पारित बैंकले गरेको हो ।
