काठमाडौँ । विद्यार्थीहरुका लागि वित्तीय साक्षरता कार्यक्रम सञ्चालन भएको छ । नेपाल राष्ट्र बैंकको सहकार्यमा भक्तपुर उद्योग वाणिज्य संघले बुधबार आयोजना गरेको संघको सभा हलमा सो कार्यक्रम सञ्चालन गरेको हो ।
उक्त कार्यक्रममा नेपाल राष्ट्र बैंकका उप निर्देशक टेकराज भण्डारीले प्रस्तुतीकरण दिएका थिए । उनले वित्तीय साक्षरता, बचतको महत्व, बैंकिङ कर्जा, कर्जाको दुरुपयोग गर्दा आइपर्ने समस्या, बेस रेट र प्रिमियर रेट बारे जानकारी गराएका थिए ।
त्यस्तै, उनले नेपाल राष्ट्र बैंकको स्वीकृतिमा बचत तथा कर्जा कारोवारका लागि स्थापित बैंक तथा वित्तीय संस्थाहरुको बारेमा समेत प्रकाश पारेका थिए । साथै, विधुतीय भुक्तानीको बारेमा स्पष्ट पार्दै उनले वित्तीय ठगीबाट बच्ने उपायहरुका बारेमा जानकारी गराउँदै विद्यार्थीहरुलाई बिमाको बारेमा समेत स्पष्ट पारेका थिए ।
नेपाल राष्ट्र बैंकसँग उद्योग वाणिज्य संघको मागमा विद्यार्थीहरुका लागि आयोजना गरिएको वित्तीय साक्षरता कार्यक्रम पहिलो रहेको उप निर्देशक भण्डारीले जानकारी दिएका थिए । उक्त कार्यक्रममा संघका अध्यक्ष शिवप्रसाद मानन्धरले संघको आयोजनामा सञ्चालन भएको वित्तीय साक्षरता कार्यक्रमबाट सहभागी विद्यार्थीहरु लाभान्वित हुनेमा विश्वास व्यक्त गरेका हुन् ।
उनले यस किसिमका वित्तीय कार्यक्रम लगायत विभिन्न तालिममा सहभागी भई भविष्यमा सफल व्यवसायी तथा उद्यमी बन्न विद्यार्थीहरुलाई अभिप्रेरित गरेको जनाएका छन् । साथै, संघका वरिष्ठ उपाध्यक्ष रोशनीमैयाँ धौबञ्जा, उपाध्यक्ष कृष्णमुरारी न्यौपाने, महासचिव दिनेश गोसाई लगायतले आ-आफ्नो धारणा राखेका थिए ।
उक्त कार्यक्रममा भक्तपुर जिल्ला स्थित बागिश्वरी कलेजका ४२ जना, बासु कलेजका १० जना र निकोल्सन कलेजका २० जना विद्यार्थी सहभागी रहेको भक्तपुर उद्योग वाणिज्य संघले जानकारी दिएको छ ।
प्रतिक्रिया दिनुहोस्