काठमाडौँ । गरिमा विकास बैंकको क्रेडिट कार्डमा ईएमआई सेवा सुरु भएको छ । उक्त बैंकले विकास बैंकहरुमा पहिलो पटक क्रेडिट कार्डमा ईएमआई सेवा सुरु गरेको हो ।
“आज किन्नुहोस् र पछि तिर्नुहोस्” सिद्धान्तमा आधारित रहने क्रेडिट कार्ड सुविधा गरिमा विकास बैंकले आफ्ना ग्राहकहरुका लागि सुरुवात गरिसकेको छ । नेपालमा करिव तीन दशक अगाडी सुरुवात भएको क्रेडिट कार्ड सुविधामा आजसम्म पनि सिमित नेपालीहरुको मात्र पहुँच पुगेको देखिन्छ ।
त्यस्तै, क्रेडिट कार्डको प्रयोग उपयोगिता र फाइदा सम्बन्धी जागरुकताको कमीले गर्दा नै यसको पहुँच आम समुदायमा नपुगेको बैंकले जनाएको छ । उक्त बैंकले यसलाई थप ग्राहक मैत्री बनाउने उद्देश्यका साथ विकास बैंकहरुमा नै पहिलो पटक क्रेडिट कार्डमा ईएमआई सेवा अर्थात् किस्ताबन्दीको सुरुवात गरेको हो ।
यस अन्तर्गत, बैंकले सम्झौता गरेको विक्रेताहरुसँग सामान खरिद गरी गरिमा विकास बैंकको क्रेडिट कार्डबाट भुक्तानी गर्दा सबै खरिद रकम एकै पटक नभई ० प्रतिशत ब्याजदरमा मासिक किस्ताको रुपमा तिर्न सकिने व्यवस्था गरेको छ । साथै, ग्राहक आफैले पनि अरु कतैबाट सामान खरिद गरि गरिमा विकास बैंकमा भ्याट बिल पेश गरि उक्त सुविधा लिन चाहेमा पनि सजिलै लिन सक्नेछन् ।
त्यस्तै, आउँदै गरेको वडा दसैँ तथा तिहारमा सामान खरिद गर्न मन हुने तर तुरुन्तै सबै रकम भुक्तानी गर्न असहज हुने ग्राहकहरुले उक्त सुविधा मार्फत लाभ उठाउन सक्नेछन् । साथै, बैंकले सबै नेपालीको पहुँचमा क्रेडिट कार्ड पहुँच पुग्नेछ र यसले देशको समस्त आर्थिक प्रणाली चलायमान रहने विश्वास राखेको छ ।
सो बैंकले देशभर १ सय २२ शाखा कार्यालय तथा ५० एटिएम एवं विभिन्न डिजिटल बैंकिङ मार्फत सरल, सुरक्षित र गुणस्तरीय बैकिङ सेवा प्रवाह गर्दै आईरहेको छ ।
