काठमाडौँ । कुमारी क्यापिटलको लगानीकर्ता सचेतना कार्यक्रम सम्पन्न भएको छ । कुमारी क्यापिटलले “विश्वलगानी सप्ताह २०२३” को अवसरमा विशेष लगानीकर्ता सचेतना कार्यक्रम आयोजना गरी स्थानीय लगानीकर्तामा वित्तीय साक्षरता प्रबद्र्धन गर्दै कार्यक्रम सम्पन्न गरेको हो ।
सो कार्यक्रममा नेपाल धितोपत्र बोर्ड सेबोन, कुमारी क्यापिटलका इन्भेष्टमेन्ट बैंकिङका प्रमुख ममिन शाक्य र कुमारी क्यापिटलका मर्चेन्ट बैंकिङका प्रमुख सविन बुढाथोकीको सहभागीता रहेको थियो । साथै, पाल्पाको तानसेनमा बसोबास गर्ने स्थानीय लगानीकर्तालाई सेयर बजारमा सहभागिता जनाउन र लगानी सम्बन्धी जानकारीका निर्णय गर्नका सम्भावित फाइदा बारे जानकारी गराउने उद्देश्यले पाल्पा स्थित कुमारी बैंक, पाल्पा तानसेन शाखा सँगको सहकार्यमा लगानीकर्ता सचेतना कार्यक्रमको आयोजना कुमारी क्यापिटलले गरेको थियो ।
त्यस्तै, सेबोनको प्रतिनिधित्व गर्दै बसन्त रसालीले आफ्नो सम्बोधनमा नियामक अनुपालन र जिम्मेवार लगानीको महत्त्वमा जोड दिएका थिए । साथै, नेपालको धितोपत्र बजारलाई नियन्त्रण गर्ने नियामक ढाँचामा अन्तर्दृष्टि प्रदान गरेर सहभागीहरूलाई सेबोनले तोकेका दिशा निर्देशहरूको पालना गर्दै लगानीका अवसरहरू खोज्न प्रोत्साहित गरेका थिए ।
कुमारी क्यापिटलका इन्भेष्टमेन्ट बैंकिङका प्रमुख ममिन शाक्यले सेयर बजारको लगानी रणनीतिबारे बहुमूल्य अन्तर्दृष्टि साझा गर्नुका साथै धितोपत्रमा लगानी गर्दा हुने दीर्घकालीन फाइदाहरू बारे चर्चा गरेका थिए । शाक्यले सफल लगानी पोर्टफोलियो निर्माणमा अनुसन्धान, जोखिम व्यवस्थापन र विविधीकरणको महत्वलाई प्रकाश पारेका थिए ।
कुमारी क्यापिटलको लगानीकर्ता सचेतना कार्यक्रममा स्थानीय लगानीकर्ताहरूको सक्रिय सहभागिता, उत्सुकता पूर्वक छलफल तथा स्टक बजार लगानीको बारेमा प्रश्नहरू उठेको जानकारी क्यापिटलले दिएको छ ।
