काठमाडौँ । नेपाल चेम्बर अफ कमर्सले नेपालमा लगानीका लागि अर्जेन्टिनलाई आग्रह गरेको छ । नेपालका लागि अर्जेन्टिनाका राजदूत ह्युगो जाभियर गोवीसँग चेम्बर भवनमा आज भएको भेटवार्तामा चेम्बर अध्यक्ष राजेन्द्र मल्लले लगानीका लागि आग्रह गरेका हुन् ।
नेपालको पर्यटन, सुचना प्रविधि लगायतका क्षेत्रमा प्रतिफलको उच्च सम्भावना भएको अध्यक्ष मल्लले बताएका छन् । मल्लले भने, ‘अर्जेन्टिना भौगोलिक दृष्टिकोणले टाढा भएपनि व्यापारिक क्षेत्रमा थुप्रै सहकार्य गर्न सकिन्छ । नेपालको पर्यटन क्षेत्र पृथक खालको छ । सुचना प्रविधिमा पनि अधिक सम्भावना छ । दुई देशका निजी क्षेत्रबीच सहकार्य मार्फत लगानीका लागि आग्रह गर्दछु ।’
नेपालमा अवैतनिक दुतको नियुक्ती गरेर व्यापारिक सहकार्य गर्नसमेत अध्यक्ष मल्लले राजदुत गोवीसँग आग्रह गरे । नेपाल अर्जेन्टिनाबीचको कुटनीतिक सम्बन्ध ६० वर्ष पुरा भएको सन्र्दभमा अध्यक्ष मल्लले व्यापारिक सम्बन्धलाई थप विस्तार गर्नुपर्नेमा जोड दिएका छन् । साथै, अध्यक्ष मल्लले अर्जेन्टिनाको निजी क्षेत्र र नेपाल चेम्बर अफ कमर्सबीच सहकार्य गर्न सकिए आर्थिक गतिविधी विस्तार हुने बताए ।
नेपालले अर्जेन्टिनाबाट गत वर्ष करिव २५ अर्व रुपैयाँको वस्तु आयात गरेको थियो । राजदुत गोवीसँग अध्यक्ष मल्लले नेपालको जलविद्युत, वनजन्य उद्योग, जडीबुटी प्रशोधन जस्ता क्षेत्रमासमेत लगानीका लागि प्रस्ताव गरेका छन् ।
त्यस्तै, दुई देशका निजी क्षेत्र स्तरमा उच्चस्तरीय व्यपारिक भ्रमण गराएर आर्थिक गतिविधी विस्तार गर्न सकिनेमा अध्यक्ष मल्लले जोड दिएका छन् । जवाफमा राजदुत गोवीले नेपालमा आर्थिक गतिविधी विस्तार गर्नका लागि आफुले पहल गर्ने बताउनुभयो । हिमालय पर्वतको देश नेपाल भौगोलिक र प्राकृतिक दृष्टिकोणले समेत उच्च रहेको राजदूत गोवीको भनाई छ ।
दुई मुलुकबीचको सम्बन्धलाई जनस्तरबाटै विकास गर्नुपर्नेमा राजदुत गोवीले जोडसमेत दिनुका छन् । उनले भने, नेपालसँगको सम्बन्धलाई जनस्तरबाटै विकास गर्न आवश्यक छ । यसका लागि पनि म पहल गर्छु, ।’
नेपालको खाद्य सुरक्षाका लागि सहयोग गर्न अर्जेन्टिना तयार रहेकोसमेत राजदुत गोवीले बताएका छन् ।
