काठमाडौँ । नेपाल लाइफ क्यापिटलले जनकपुरमा वित्तीय साक्षरता कार्यक्रम सम्पन्न गरेको छ । उक्त क्यापीटलले नेपाल धितोपत्र बोर्ड सँगको समन्वयमा मधेश प्रदेशको जनकपुरमा ‘लगानीका आधारभूत विशेषता धितोपत्र बजार र जोखिम व्यवस्थापन’ विषयमा वित्तीय साक्षरता कार्यक्रम सम्पन्न गरेको हो ।
शेयर बजार जोखिम तथा प्रतिफलको प्रभाव बारे जनतालाई साक्षर गराउने मुख्य अभिप्रायका साथ २०८०-०६-१९ गते दिउँसो ३ बजेदेखि ६ बजे सम्म मसला कटेज जनकपुरधाममा आयोजित कार्यक्रममा विभिन्न क्षेत्रका १ सय ८ व्यक्तिहरुको सहभागीता रहेको नेपाल लाइफ क्यापिटलले जनाएको छ ।
नेपाल धितोपत्र बोर्डका निर्देशक हरि प्रसाद भुसालको अध्यक्षतामा कार्यक्रम सम्पन्न भएको थियो । साथै, नेपाल लाइफ क्यापिटलका प्रमुख कार्यकारी अधिकृत नविन बाँस्कोटाले लगानीका क्षेत्र र सेयर बजारको महत्वबारे जानकारी दिएका थिए ।
त्यस्तै, निर्देशक भुसालले निम्न आय भएका व्यक्तिले सेयर बजारमा कसरी पहुँच पुर्याउन सक्छन् र बजारबाट सर्वसाधारणले कसरी लाभ लिन सक्छन् भन्ने विषयमा जोड दिएका थिए । साथै, कोष प्रबन्धक नवराज सिलवालले ‘लगानीका आधारभूत कुरा धितोपत्र बजार र जोखिम व्यवस्थापन’का विषयमा प्रस्तुतिकरण गरेका थिए ।
कोष प्रबन्धक सिलवालले शेयर बजारको महत्व, यसले कसरी काम गर्छ तथा लगानीका थप क्षेत्रहरू के हुन् भन्ने बारेमा सर्वसाधारणमा साक्षरता ल्याउने कुरामा जोड दिएका थिए । उनले धितोपत्र बजारमा हुने जोखिम, बजारमा लगानीलाई कसरी पृथकीकरण गरी जोखिम न्यूनीकरण गर्न सकिन्छ भन्ने विषयमा थप जानकारी दिएका थिए ।
उक्त कार्यक्रमको बिचमा प्रश्न उत्तर सत्र पनि भएको थियो । नेपाल लाइफ क्यापिटलका अधिकृत विज्ञान नेपालले एक एक गरी सहभागीहरुको जिज्ञासाको जवाफ दिएका थिए । साथै, उनले सहभागीहरुलाई डिम्याट, ब्रोकर, सेयर बजार र जोखिम विश्लेषणको बारेमा जानकारी समेत प्रदान गरेका थिए ।
त्यस्तै, सर्वेक्षणबाट करिब ७० प्रतिशत सहभागीहरु आईपीओ आवेदनका लागि प्राइमरी मार्केटमा संलग्न रहे पनि शेयर बजारमा करिब ३० प्रतिशत मात्रै सक्रिय रहेको क्यापिटलले जनाएको छ । साथै, करिब ३० प्रतिशत आईपीओ होल्डरलाई आईपीओ सेयर बेच्ने तथा दोस्रो बजारमा थप सेयर कसरी किन्ने बारे जानकारी नरहेको क्यापीटलले थाहा पाएको छ ।
नेपाल लाइफ क्यापिटलको वित्तीय साक्षरता कार्यक्रममा प्रस्तुतीकरण र प्रश्नउत्तर सत्र पछि अतिथिहरूले मन्तव्य समेत दिएका थिए ।
