काठमाडौँ । मुगुमा एक नगरपालिकाले अन्तरजातीय विवाह गर्ने जोडीलाई एक लाख रुपैयाँ दिन सुरु गरेको छ । मुगुको छायाँनाथ रारा गाउँपालिकाले नगरसभामार्फत गरेको निर्णय कार्यान्वयन गर्दै अन्तरजातीय विवाह गरेका जोडीलाई प्रोत्साहनस्वरुप एक लाख रुपैयाँ दिन सुरु गरेको हो ।
नगरपालिकाले अन्तरजातीय विवाह गरेका छायाँनाथ रारा–१० चरापगाउँका २५ वर्षीय दवीकृष्ण कामी र सोरु गाउँपालिका–४ लिब्रकी २४ वर्षीया रञ्जिता बुढालाई प्रोत्साहनस्वरुप एक लाख रुपैयाँ प्रदान गरेको छ ।
नगरपालिकाले १२औँ नगरसभा मार्फत अन्तरजातीय विवाह गर्ने जोडीलाई प्रोत्साहनस्वरुप एक लाख रुपैयाँ उपलब्ध गराउने घोषणा गरेको थियो । सोही घोषणा अनुसार नगरपालिकामा अन्तरजातीय विवाह गर्ने जोडीलाई एक लाख रुपैयाँ दिइएको र आगामी दिनमा पनि दिइने नगरप्रमुख विष्णुकुमार भामले जानकारी दिएका छन् ।
