काठमाडौँ । यतिबेला नेपाल विद्युत प्राधिकरणका प्रबन्ध निर्देशक कुलमान घिसिङ र सिमेन्ट उद्योगीहरु जुहारी खेलिरहेका छन् । कुलमानको हिसाबमा उद्योगीहरुले बिजुली बालेको अरबौँको बक्यौता तिर्न बाँकी छ । तर, उद्योगीहरु भनिरहेका छन्- ‘एक रुपैयाँ पनि तिर्न बाँकी छैन ।’
कुलमान भन्छन्- ‘बिल पठाइसक्यौँ’, उद्योगी भन्छन्- ‘बिल फर्जी हो, बिजुली बालेको प्रमाण देखाउ ।’ यही जुहारीका कारण अहिले जनताका आँखामा व्यवसायी चोर र व्यवसायीको आँखामा कुलमान फटाहा भएका छन् ।
उद्योगी भन्छन्- ‘प्रमाण देखाऊ पैसा तिर्छौँ’, कुलमान भन्छन्- ‘प्रमाण छ, पैसा तिर ।’ कुलमान र उद्योगीको यही लडाईले अहिले सरकारभित्रका मान्छेहरु, व्यवसाय गर्ने उद्योगीहरु, प्राधिकरणभित्रका कर्मचारीहरु र उद्योगीका प्यारा बनेका र तारा बनेका मिडियाकर्मीहरु पनि लडाईमा छन् । तर, कुरो सिम्पल छ, बालेको बिजुलीको पैसा तिर्नुपर्छ, नबालेको बिजुलीको पैसा तिर्नुपर्छ भने त त्यो सरासर अन्याय भयो ।
उद्यागीले भनेजस्तै प्रिय कुलमान, प्रमाण देखाइदेऊ । प्रमाण छ भने, प्रिय उद्योगी साथीहरु, बालेको बिजुलीमा किचकिच नगर, हिसाब सल्टाइदेऊ । अब प्रमाण पनि छ, अहिलेलाई पैसा छैन भने समय दिइदेऊ । तर, प्रमाण नै छैन भने, प्राधिकरण फोकटको तनाव नदेऊ ।
उद्योगी साथीहरु, कुलमानको इगो हर्ट हुनेगरी प्रधानमन्त्रीलाई भेटेर दबाब नदेऊ । अनि प्रिय कुलमान, उद्योगीहरुको इगो हर्ट हुनेगरि ‘मै मात्रै ठिक छु’ भन्ने लिँडे ढिपी नलगाऊ । यत्ति भए कुरो सिद्धियो, होइन र ?
