काठमाडौं । माल्टा पठाईदिन्छु भन्दै रकम ठगी गर्ने व्यक्ति पक्राउ परेका छन् । जुम्ला जिल्ला हिमा गाउँपालिका वडा नं. ५ घर भई हाल काठमाडौं महानगरपालिका वडा नं. १५ डल्लु बस्ने ३३ वर्षीय धर्मेन्द्र शाही पक्राउ परेका हुन् ।

उनले सोम्बार तामाङसहित २ जनालाई वैदेशिक रोजगारीका लागि माल्टा पठाईदिन्छु भनी रकम ठगी गरेका थिए । उनले माल्टा पुगेपछि प्रतिष्ठित होटलमा काम लगाइदिन्छु, मासिक एक लाख १० हजार तलब हुन्छ भनी विश्वास दिलाई प्रलोभनमा पारेर पीडितहरुबाट पटक पटक गरी ७ लाख ५ हजार रुपैयाँ ठगी गरी सम्पर्क विहीन भएका थिए ।

काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले उनलाई मङ्सिर २१ गते ललितपुर महानगरपालिका वडा नं. ४ जावलाखेलबाट पक्राउ गरेको हो । पक्राउ परेका शाहीलाई थप अनुसन्धान तथा कारवाहीका लागि वैदेशिक रोजगार विभाग ताहाचल, काठमाडौं पठाईएको प्रहरीले जनाएको छ ।