काठमाडौं । वैदेशिक रोजगारीको लागि साउदी अरब पठाईदिन्छु भन्दै रकम ठगी गर्ने मेनपावर संचालक पक्राउ परेका छन् । पक्राउ पर्नेमा नवलपरासी (पश्चिम) बर्दघाट नगरपालिका वडा नं.९ घर भई हाल काठमाडौं महानगरपालिका वडा नं. ३१ बस्ने ४२ वर्षीय लक्ष्मण विश्वा र काभ्रेपलाञ्चोक रोशी गाउँपालिका वडा नं. १० घर भएकी ४० वर्षीय सोफि मल्ल पक्राउ परेका हुन् ।
पुरानो बानेश्वरमा अवस्थित ओसो रिक्रुटिङ मेनपावरका संचालकले ओम बाबु साहलाई साउदी अरब पठाईदिने भन्दै १ लाख २५ हजार रुपैयाँ ठगी गरेका थिए । प्रतिष्ठित कम्पनीमा काम लगाईदिने, मासिक ४० हजार रुपैयाँ तलब हुन्छ भन्दै विश्वास दिलाई प्रलोभनमा पारेर रकम ठगी गरेको पीडितले बताएका छन् ।
काठमाडौँ उपत्यका अपराध अनुसन्धान कार्यालयबाट खटिएको प्रहरी टोलीले उनीहरुलाई काठमाडौँ महानगरपालिका वडा नं. ३१ बाट पक्राउ गरेको हो । उनीहरुलाई थप अनुसन्धान तथा आवश्यक कारवाहीका लागि वैदेशिक रोजगार विभाग पठाईएको प्रहरीले जनाएको छ ।
