काठमाडौँ । एकाधिकारको मुद्दामा गुगलको मातृ कम्पनी अल्फाबेटले ९३ अर्ब जरिवाना तिर्ने भएको छ । अल्फाबेटले प्ले स्टोरको एकाधिकार सम्बन्धी मुद्दामा ७० करोड डलर अर्थात् करिब ९३ अर्ब रुपैयाँ जरिवाना तिर्ने भएको हो । अमेरिकाका ५० वटा राज्य तथा उपभोक्ताहरुले दायर गरेको मुद्दामा ७० करोड डलर क्षतिपूर्ति तिर्न गुगल तयार भएको हो ।
उक्त उजुरीमा एन्ड्रोइड एपस्टोरको बजारमा गुगलले प्रतिस्पर्धा विरोधी अवैधानिक एकाधिकार कायम गरेको, एन्ड्रोइड एपहरुको मूल्य बढाएको, गुगल प्लेका कारोबारमा ३० प्रतिशतसम्म कमिसन लिएको लगायतका अभियोग लगाइएको छ । उक्त मुद्दामा ७० करोड तिरेर मिलापत्र गर्न गुगल सहमत भएको छ ।
यस विषयमा गुगलले गरेको प्रस्ताव अनुसार ६२ करोड ९० लाख डलर रकम उपभोक्ताहरुलाई जानेछ जसले एपहरु खरिद गर्दा वा एपमार्फत् कारोबार गर्दा बढी रकम तिर्नुपरेको थियो । त्यस्तै, गुगलले ७ करोड डलर ५० वटा अमेरिकी राज्य तथा १० लाख डलर मुद्दाको प्रशासनिक खर्चका लागि छुट्याएको छ ।
त्यस्तै, गुगलले आगमी ७ वर्षसम्म एन्ड्रोइड मोबाइलमा प्ले बाहेकका माध्यमबाट समेत थर्ड पार्टी एपहरु डाउनलोड गर्ने सुविधा पनि दिने भएको छ ।
