काठमाडौँ । विराटनगरबाट स्रोत नखुलेको झण्डै २० लाख रुपैयाँसहित एकजना पक्राउ परेका छन् । स्रोत नखुलेको १९ लाख ९० हजार रुपैयाँसहित ४९ वर्षीय सुरेन्द्रप्रसाद साहलाई प्रहरीले विराटनगर महानगरपालिका–६ केशलिया मार्गबाट पक्राउ गरेको हो ।
सुनसरीको देवानगञ्ज गाउँपालिका–५ घर भएका साह हुण्डी कारोबारमा संलग्न व्यक्ति भएको प्रहरीले जनाएको छ ।
जिल्ला प्रहरी कार्यालय मोरङबाट खटिएको टोलीले विशेष सूचनाको आधारमा साहलाई विराटनगर केशलिया मार्गबाट पक्राउ गरेको हो । साहलाई बरामद गरिएको नगद र उनले प्रयोग गरेको मोटरसाइकल सहित आवश्यक कारवाहीको लागि राजस्व अनुसान्धान कार्यालय इटहरी पठाइएको मोरङ प्रहरीका प्रवक्ता प्रहरी नायब उपरीक्षक रन्जनकुमार दाहालले बताएका छन् ।
अवैध हुण्डी कारोवारलाई नियन्त्रण गर्न जिल्ला प्रहरी कार्यालय मोरङले त्यसमा संलग्न कारोबारीहरूको सुक्ष्म अनुसन्धान गरी पक्राउ गर्न विशेष अपरेशन सञ्चालन गरेको जनाएको छ ।
यसक्रममा गत कात्तिक १४ गते १६ वर्षीय बालकलाई नगद २१ लाख ८७ हजार रकमसहित पक्राउ गरिएको थियो । उनलाई हुण्डी कारोबारीहरुले प्रयोग गरेको पाइएको थियो ।
