काठमाडौं । नबिल बैंक लिमिटेडले ऋणपत्र निष्काशन गर्ने भएको छ । बैंकले मङ्सिर २९ गतेदेखि प्रतिइकाई १ हजार रुपैयाँको दरमा ३० लाख इकाई ऋणपत्र जारी गर्ने भएको हो ।
बैंकले ७ वर्ष अवधिको ‘९% नबिल डेबेञ्चर २०८७’ जारी गर्न लागेको हो । सो ३० लाख इकाईमध्ये १८ लाख इकाई बैंकले आफ्नै पहलमा अन्य संघ संस्थाहरुलाई बिक्री गर्ने भएको छ भने बाँकी १२ लाख इकाई सर्वसाधारणका लागि खुला गरिने जनाईएको छ । सर्वसाधारणमा बाँडफाँट गरिने ऋणपत्रमध्ये ५ प्रतिशत अर्थात ६० हजार कित्ता ऋणपत्र सामूहिक लगानी कोषहरुका लागि छुट्याइएको छ ।
उक्त ऋणपत्रमा बैंकले ९ प्रतिशत ब्याज दिने भएको छ । यसमा बिक्री प्रबन्धकको काम कुमारी क्यापिटलले गर्नेछ । सो ऋणपत्रमा पुस ३ गतेसम्म आवेदन दिन सकिनेछ । उक्त अवधिमा सबै ऋणपत्र बिक्री नभएमा पुस १३ गतेसम्म आवेदन मिती लम्ब्याईने बैंकले जनाएको छ ।
लगानीकर्ताले न्यूनतम २५ इकाईदेखि अधिकतम १२ लाख इकाईसम्म आवेदन दिन सकिनेछ । यसमा सी–आस्वा सदस्य बैंक तथा वित्तीय संस्था र मेरो सेयर सफ्टवेयरमार्फत अनलाइनबाट आवेदन दिन सकिनेछ ।
