काठमाडौँ । नेपाल राष्ट्र बैंकले बैंकिङ प्रणालीबाट पुनः ३५ अर्ब रुपैयाँ तान्ने भएको छ । बैंकिङ प्रणालीमा अधिक तरलता भएपछि राष्ट्र बैंकले निक्षेप संकलन उपकरणमार्फत ३५ अर्ब रुपैयाँ तान्न लागेको हो ।
तरलता व्यवस्थापनका लागि भन्दै राष्ट्र बैंकले जारी गरेको ३५ अर्ब रुपैयाँको निक्षेप संकलन उपकरणको पुष ११ गते (बुधबार) बोलकबोल हुने राष्ट्र बैंकले जनाएको छ ।
राष्ट्र बैंकका अनुसार इच्छुक बैंक तथा वित्तीय संस्थाले पुष ११ गते दिउँसो २ बजेसम्म बोलकबोलमार्फत आवेदन दिन सक्नेछन् । राष्ट्र बैंकले निक्षेप संकलन उपकरणमार्फत तान्न लागेको उक्त निक्षेपको अवधि १४ दिनको रहनेछ । अर्थात राष्ट्र बैंकले तानेको निक्षेपको साँवा र ब्याज भुक्तानी मिती पुष २५ गते निर्धारण गरिएको छ ।
निक्षेप संकलनको बोलकबोलमा नेपाल राष्ट्र बैंकबाट इजाजत प्राप्त ‘क’, ‘ख’ र ‘ग’ वर्गका बैंक तथा वित्तीय संस्थाले मात्रै सहभागिता हुन पाउनेछन् । बैंक तथा वित्तीय संस्थाहरुले न्यूनतम १० करोड र अधिकतम ५ करोडले निःशेष भाग जानेगरि निष्कासित रकम बराबरको लागि माग गर्न सक्नेछन् ।
