काठमाडौँ । वैदेशिक रोजगारीका लागि पोल्याण्ड पठाईदिने भन्दै रकम ठगी गर्ने एक जना पक्राउ परेका छन् । पक्राउ पर्नेमा धनकुटा उपमहानगरपालिका वडा नं. ७ घर भई हाल जिल्ला भक्तपुर सुर्यविनायक नगरपालिका वडा नं. १३ बालकोट बस्ने २५ वर्षीय प्रदिप बुढाथोकी पक्राउ परेका हुन् ।
उनले कल्पना विश्वकर्मालाई पोल्याण्ड पठाईदिने भन्दै १ लाख ८० हजार रुपैयाँ ठगी गरेका हुन् । बुढाथोकीले पोल्याण्ड पुगेपछि प्रतिष्ठित कम्पनीमा काम लगाइदिने, मासिक १ लाख २० हजार तलब हुन्छ भन्दै विश्वास दिलाई प्रलोभनमा परेका थिए ।
उनलाई काठमाडौं उपत्यका अपराध अनुसन्धान कार्यलयबाट खटिएको प्रहरी टोलीले काठमाडौं महानगरपालिका वडा नं. ३१ नयाँ बानेश्वरबाट पक्राउ गरेको हो । पक्राउ परेका बुढाथोकीलाई थप अनुसन्धान तथा कारवाहीका लागि वैदेशिक रोजगार विभाग पठाईएको प्रहरीले जनाएको छ ।
