काठमाडौं । दोस्रो बजारमा सोमबारदेखि नयाँ ब्रोकर कम्पनीको रुपमा बेनी सेक्युरिटिजले कारोबार शुभारम्भ गरेको छ । बानेश्वरको रुद्रमति मार्गमा रहेको कम्पनीले औपचारिक रुपमा सोमबारदेखि कारोबार सुरु गरेको हो ।

बेनी सेक्युरिटिज प्रालि (ब्रोकर नम्बर ९३) ले नेपाल स्टक एक्सचेन्ज (नेप्से) बाट आधिकारीक रुपमा गत कात्तिक २९ गते सदस्यता प्राप्त गरेसँगै कम्पनी सञ्चालनमा आएको हो ।

लगानीकर्ताको बढ्दो मागलाई मध्यनजर गर्दै सेयर कारोवारका लागि सञ्चालनमा ल्याएको बेनी सेक्युरिटिज कम्पनीको चुक्ता पुँजी २० करोड रहेको छ । कम्पनीले आफ्नो नाम जस्तै सेवापनि सजिलो रुपमा प्रदान गर्ने प्रतिवद्धता व्यक्त गरेको छ ।

खुला अर्थनीति र पुँजी बजारको चरित्रका आधारमा ब्रोकर लाइसेन्स सबैको लागि खुला राख्ने नीति ल्याए संगै नयाँ ब्रोकर कम्पनीले कारोबारको अवसर पाएका हुन् ।