काठमाडौँ । स्यानिटरी प्याड खरिदमा भ्रष्टाचार गरेको भन्दै अख्तियार दुरुपयोग अनुसन्धान आयोगले सप्तरीको रुपनी गाउँपालिकाका प्रमुख प्रशासकीय अधिकृतसहित पाँच जनाविरुद्ध भ्रष्टाचार मुद्दा दायर गरेको छ । अख्तियारले तत्कालीन प्रमुख प्रशासकीय अधिकृत अरविन्दकुमार चौधरीसहित पाँच जनाविरुद्ध विशेष अदालतमा मुद्दा दायर गरेको हो ।

मुद्दा दायर हुनेहरुमा तत्कालीन प्रमुख प्रशासकीय अधिकृत चौधरीसहित लेखा अधिकृत श्यामसुन्दर यादव, माध्यामिक तह शिक्षक श्यामप्रसाद यादब, नायब सुब्बा सुजन दाहाल र लक्ष्मी ट्रेडर्स एण्ड सप्लायर्स राजविराज दोस्रो पक्षको तर्फबाट प्रोप्राइटर ललिताकुमारी साह रहेका छन् ।

उनीहरुमाथि स्यानिटरी प्याड खरिदबिक्री कार्यमा ८ लाख ७४ हजार ३ रुपैयाँ भ्रष्टाचार गरेको आरोप लागेको छ ।

गाउँपालिकाको मिलेमतोमा खुद्रा मूल्यभन्दा दुई गुणा बढी रकममा स्यानेटरी प्याट खरिद गरिएको भन्ने उजुरीका आधारमा छानविन गर्दा प्याज खरिदमा भ्रष्टाचार भएको पाइएको अख्तियारले जनाएको छ । सोही छानविनका आधारमा पाँच जनाविरुद्ध भ्रष्टाचार मुद्दा दायर गरिएको हो ।