काठमाडौँ । कैलाश हेलिकप्टर सर्भिसेस लिमिटेडले प्रिमियमा आईपीओ जारी गर्ने भएको छ । जारी पुँजी ३५ करोड रुपैयाँ रहेको कैलाश हेलिकप्टरले १० प्रतिशत अर्थात ३ लाख ५० हजार कित्ता सेयर सर्वसाधारणमा जारी गर्ने भएको हो ।
आईपीओ निष्कासनका लागि कम्पनीले धितोपत्र निष्कासन तथा बिक्री प्रबन्धकमा मुक्तिनाथ क्यापिटललाई नियुक्त गरेको छ । बिक्री प्रबन्धक नियुक्ति सम्बन्धी सम्झौतापत्रमा माघ ३ गते (बुधबार) हेलिकप्टरका तर्फबाट प्रबन्ध सञ्चालक प्रताप जङ्ग पाण्डे र क्यापिटलका तर्फबाट प्रमुख कार्यकारी अधिकृत कबिन्द्रध्वज जोशीले हस्ताक्षर गरेका हुन् ।
सन् २०१८ मार्च २३ बाट सञ्चालनमा आएको कैलाश हेलिकप्टर पहिलो वर्षदेखि नै नाफामा रहँदै आएको कम्पनीले जनाएको छ । कम्पनीका अनुसार कोभिड-१९ महामारीको समयमा बाहेक कैलाश हेलिकप्टरले लगानीकर्तालाई प्रतिफल दिँदै आएको छ । गत आर्थिक वर्षमा पनि कम्पनीले ५ प्रतिशत बोनस सेयर र १० प्रतिशत नगद लाभांश वितरण गरेको थियो ।
नेपाल नागरिक उड्डयन प्राधिकरणको निर्देशन पालना गर्न कम्पनीले पुँजी वृद्धि गरी थप दुईवटा हेलिकप्टर सञ्चालन गर्ने उद्धेश्यसहित प्रिमियममा आईपीओ जारी गर्न लागेको कम्पनीले जनाएको छ ।
